اتر پردیش کے ضلع بریلی میں کورونا وائرس کی دوسری لہر کا اثر تقریباً ختم ہونے کے بعد زندگی کو پٹری پر لانے کی تمام کوششیں کی جا رہی ہیں۔ ضلع انتظامیہ نے بھی نامکمل ترقیاتی کاموں کو مکمل کرانے کے احکامات جاری کیے ہیں۔
بریلی میں اب شہر کے ترقیاتی منصوبوں میں تاخیر کرنا ”ایگزیکٹو اینڈ ورکنگ آرگنائزیشن“ اور متعلقہ سرکاری محکمہ کے افسران کو کافی مہنگا ثابت ہو سکتا ہے۔ ڈی ایم نتیش کمار نے تاخیر کی وجہ سے پروجیکٹ کاسٹ میں اضافہ کرنے پر متعلقہ محکمے کے افسران کے خلاف تحقیقات کرانے اور قانونی کارروائی کرنے کی ہدایت کی ہے۔
تخمینہ لاگت میں اضافہ نہ کرنے کی ہدایت ڈی ایم نتیش کمار نے ضلع کلیکٹریٹ میں ماہانہ جائزہ میٹنگ کے دوران ایسی تمام تجاویز کو مسترد کر دیا، جن میں کسی منصوبہ کی پروجیکٹ کاسٹ میں اضافہ کرنے کا مطالبہ کیا گیا تھا۔ ایم ایس ڈی پی ”ملٹی سیکٹورل ڈیولپمنٹ پروگرام“ کے تحت کئی منصوبوں کے بجٹ میں اضافے کی تجاویز ارسال کی گئی تھیں۔ ڈی ایم نے ایسے تمام افسران کے خلاف تحقیقات کرانے کے بعد کارروائی کرنے کی ہدایت دی ہے۔
ضلع مجسٹریٹ نے مزید کہا ہے 'اگر بارش کے اوائل میں سڑک ٹوٹنے یا دھنسنے کی خبر موصول ہوتی ہے اور اُس سڑک میں غیر معیاری مواد کا استعمال کرنے کا معاملہ منظر عام پر آتا ہے تو متعلقہ محکمہ کو کارروائی کے لیے تیار رہنا چاہیے'۔
