یوگی حکومت کے دور میں قانون نام کی کوئی چیز نہیں : تنج پنیا

ای ٹی وی بھارت کے ساتھ گفتگو میں کانگریس کے رہنما تنج پنیا کا کہنا ہے کہ ریاست میں نظم و نسق نام کی کوئی چیز نہیں رہ گئی ہے، بی جے پی کے رہنما جرائم پیشہ لوگوں کے ساتھ کھڑے ہیں۔ جس کی وجہ سے عام آدمی کو انصاف ملنے کی تمام امیدیں ختم ہوتی جا رہی ہیں۔

ریاست اترپردیش کے ضلع بارہ بنکی میں ریاستی کانگریس کے ایس سی ایس ٹی محکمے کے صدر تنح پنیا نے ریاست کے نظم و نسق کو دیکھتے ہوئے یوگی حکومت کو تنقید کا نشانہ بنایا۔

بارہ بنکی میں اپنی رہائش گاہ پر ای ٹی وی بھارت کے ساتھ خصوصی گفتگو میں تنج پنیا کا کہنا ہے کہ ریاست میں نظم و نسق نام کی کوئی چیز نہیں رہ گئی ہے، بی جے پی کے رہنما جرائم پیشہ لوگوں کے ساتھ کھڑے ہیں۔ جس کی وجہ سے عام آدمی کو انصاف ملنے کی تمام امیدیں ختم ہوتی جا رہی ہیں۔

تنج پنیا نے کہا کہ ریاست میں بی جے پی حکومت اس وعدے کے ساتھ آئی تھی کہ جرائم پیشہ افراد جیل میں ہوں گے اور اگر جیل میں نہیں ہوں گے تو وہ ریاست کے باہر ہوں گے۔ ان کا دعوی تھا کہ وہ غنڈہ راج ختم کریں گے لیکن اس وعدے کے برعکس بی جے پی حکومت میں غنڈہ راج بڑھتا ہی جا رہا ہے۔

انہوں نے کہا کہ قانون کے خوف سے دور جرائم پیشہ افراد کھلے عام گھوم رہے ہیں اور ان کے رہنما ہی ان کی مدد کر رہے ہیں۔ انہوں نے بارہ بنکی کے اس واقعہ کا بھی ذکر کیا جس میں ایک دلت نابالغ لڑکی کے ساتھ جنسی زیادتی ہونے کے بعد جب وہ حاملہ ہوجاتی ہے تو اس کی شادی جبراً ایک نابالغ لڑکے سے کردی جاتی ہے۔اس طرح کے صورتحال سے واضح ہے کہ ریاست میں نظم و نسق نام کی کوئی چیز نہیں رہ گئی ہے۔