بارہ بنکی: خواتین اپنے حقوق کے لیے کمر بستہ

مسلم خواتین اب اپنے حقوق کے تئیں نہ صرف بیدار ہو رہی ہیں بلکہ اب وہ اپنے مسائل کے خلاف انصاف کی لڑائی میں بھی پیچھے نہیں ہیں۔

ریاست اترپردیش کے ضلع بارہ بنکی میں ریاستی خواتین کمیشن کی جانب سے منعقد کی گئی عوامی سماعت کے دوران یہ واضح طور پر نظر آئی کہ خواتین نے اپنے حقوق کے لیے آوازیں بلند کرنا شروع کر دیا ہے، اس عوامی سماعت میں تقریباً نصف سے زیادہ تعداد مسلم خواتین کی تھی۔

بارہ بنکی میں پی ڈی ڈبلیو ڈی کے گیسٹ ہاؤس میں ریاستی خواتین کمیشن کی جانب سے عوامی سماعت کا انعقاد کیا گیا، یہ سماعت ہر ماہ کے تیسری بدھ کو ہوتی ہے، یوں تو اس سماعت میں کچھ نیا نہیں ہے لیکن حیران کن بات یہ ہے کہ فریادی خواتین میں مسلم خواتین کی تعداد کافی تعداد زیادہ تھی۔

ان مسلم خواتین کی شکایت کا موضوع ایسا ہے جن پر وہ کبھی آواز اٹھانے سے خوف کھاتی تھیں لیکن اب وہ بیدار ہو رہی ہیں اور اپنی پریشانی کھل کر سامنے لارہی ہیں۔

اس کے علاوہ کچھ ایسے بھی کنبے ہیں جن کا تعلیمی میعار اتنا درست نہیں لیکن وہ بھی اس سنوائی میں اپنے مسائل کو لیکر آئی تھیں، مسلم خواتین کے سارے معاملات گھریلو ہیں۔

ریاستی خواتین کمیشن بھی اس بات سے اتفاق رائے رکھتا ہے کہ مسلم خواتین اب اپنے حقوق کے لئے بیدار ہو رہی ہیں۔