بارہ بنکی: مختار انصاری ایمبولینس معاملے میں مزید تین 3 افراد گرفتار

باندہ جیل میں بند بی ایس پی کے رکن اسمبلی مختار انصاری کی فرضی دستاویزات کی بنیاد پر ایمبولینس کے رجسٹریشن کے معاملے میں مزید تین ملزمین گرفتار کیا گیا ہے۔ ان تینوں پر 25-25 ہزار روپے کے انعام کا اعلان کیا گیا تھا۔ اس معاملے میں اب تک مجموعی طورپر 8 افراد کی گرفتاری ہو چکی ہے۔

اتر پردیش کے ضلع بارہ بنکی کے پولیس سپریٹینڈنٹ یمونا پرساد نے بتایا منگل کو 25-25 ہزار کے انعامی بدمعاش فیروز قریشی، شاہد اور شتروہن کو بارہ بنکی کے بس اسٹاپ سے گرفتار کیا گیا ہے۔ یہ تینوں ضلع غازی پور کے رہنے والے ہیں۔

پولیس سپریٹینڈنٹ کے مطابق گرفتار شدہ افراد نے بتایا کہ وہ لوگ مختار انصاری کی ایمبولینس چلاتے تھے اور دیگر ساتھی اس میں بیٹھ کر مختار انصاری کی حفاظت کرتے تھے۔

گرفتار شدہ افراد کے مطابق اعظم گڑھ، لکھنؤ یا جہاں کہیں بھی مختار انصاری کو جانا ہوتا یہ انہیں لے کر وہاں جاتے تھے۔ ایمبولینس کو پنجاب کے روپڑ بھی یہی افراد لےکر گئے تھے۔

پولیس کی کارروائی کے ڈر سے یہ لوگ ایمبولینس کو روپڑ میں چھوڑ کر فرار ہو گئے تھے۔ پولیس کو ابھی بھی اس معاملے میں ظفر عرف چندا اور افروز خان کی تلاش ہے۔