بارہ بنکی: ٹرینوں میں لوٹ کرنے والے گروہ کا پردہ فاش

ریاست اتر پردیش کے ضلع بارہ بنکی میں منگل کو جی آر پی نے ٹرینوں میں لوگوں کو گمراہ کر کے لوٹ کرنے والے گروہ کا پردہ فاش کیا ہے۔ یہ گروہ گزشتہ ایک برس سے سر گرم تھا اور یہ گروہ فیض آباد سے کانپور تک واردات کو انجام دیتا تھا۔ پولیس نے گروہ کے سرغنہ سمیت چار ملزمان کو گرفتار کیا ہے۔ ان کے پاس 17 موبائیل، زیورات اور دیگر سامان برآمد کیا ہے۔

جی آر پی تھانہ انچارج انجنی کمار مشرا نے بتایا کہ 21 دسمبر کی رات مخبر کی اطلاع پر ملحور ریلوے اسٹیشن کے پاس سے چیکنگ کے دوران فیض آباد ضلع کے ردولی قصبے کے شعیب، سیتاپور کے بازار قصبے کے نفیس، لکھنؤ کے چنہٹ حلقے کے اسلام اور شہر کوتوالی کے بنکی کے اشتیاق کو گرفتار کیا گیا ہے۔

یہ چاروں مختلف طریقے سے لوٹ کی واردات کو انجام دیتے تھے۔ یہ لوگ ٹرین چڑھتے تھے اور جن مسافروں کے پاس بچے ہوتے تھے، پہلے ان کی نشان دہی کرتے تھے۔

پھر ان کے بچوں کو رولا کر ان کے والدین کا ذہن بھٹکا دیتے تھے۔ اس کے بعد وہ ان کا سامان لیکر رفو چکر ہو جاتے تھے۔

اس کے علاوہ یہ گروہ ٹرین میں موبائیل پر بات کرتے یا موبائیل دیکھتے وقت چھین کر بھاگ جاتے تھے۔