بارہ بنکی میں بھارت بند کا ملا جلا اثر

اتر پردیش میں بہوجن کرانتی مورچہ کی جانب سے بھارت بند کا ملا جلا اثر نظر آیا. بند کے دوران کچھ جگہوں پر دکانیں بند رہیں تو کچھ جگہ حسب معمول دکانیں کھلی نظر آئیں۔

ریاست اتر پردیش کے ضلع بارہ بنکی میں بھارت بند کے مد نظر آج نبلیٹ تراہے سے دھنوکھر تک زیادہ تر دکانیں بند رہیں۔ لیکن دھنوکھر چوراہے سے پیر بٹاون تک زیادہ تر دکانیں کھلی دیکھی گئی۔

کھلی دکانوں پر عوام خریداری کرتی نظر آئی۔ بند کے دوران کسی نے بھی کسی کی دکان زبردستی بند نہیں کروائی۔ اور نہ ہی بند دکانوں کو کھلوانے کے لئے زور ڈالا گیا۔

بھارت بند کی کال بہوجن کرانتی مورچہ کی طرف سے دی گئی تھی، وہیں مورچہ کے رہنماؤں کا دعویٰ ہے کہ بھارت بند کی کوشش کامیاب رہی ہے اور 50 فیصد دکانیں بند دیکھی گئی ہیں۔

واضح رہے کہ بھارت بند کی کال اصل میں آل انڈیا مسلم پرسنل لا بورڈ کے سیکریٹری مولانا سجاد نومانی نے دی تھی، جس کے بعد ان کی اس کال کو بہوجن کرانتی مورچہ اور جمیعت علماء ہند کی حمایت ملی۔

بھارت بند کا اثر گجرات، اندھرا پردیش اور جھارکھنڈ میں دیکھنے کو ملا، اس سے پہلے بھی 8 اور 9 جنوری کو 10 ٹریڈ یونینز کی طرف سے بھارت بند کی کال دی گئ تھی۔