بارہ بنکی: داروغہ کو معطل کرنے کا مطالبہ

ریاست اترپردیش کے ضلع بارہ بنکی کے جہانگیر آباد تھانے کے داروغہ کی جانب سے کروائی کرنے پر بھارتی کسان یونین آگ بگولا ہوگئی ہے، ناراض کسان یونین کے کارکنان نے تھانے کا گھراؤ کردیا اور داروغہ کو معطل کرنے کے مطالبے پر بضد تھے۔

احتجاج کر رہے کسان یونین کے کارکنان پولس اہلکاروں کے بار بار سمجھانے کے باوجود نہیں مانے بعد میں سی او سٹی کی یقین دہانی پر کسان یونین کارکنان تھانے سے واپس لوٹ گئے۔

تفصیلات کے مطابق جہانگیر آباد تھانہ حلقے میں جاری رام پور مہوتسو میں 13 نومبر کی رات ہو رہے بھوجپوری پروگرام میں کچھ لڑکے ڈانس کر رہے تھے، پولس ان میں سے تین لوگوں کو گرفتار کر کے لے گئی اور رات بھر تھانے میں رکھا۔

اس کے بعد صبح گھر والوں سے ایک ایک ہزار روپیہ لے کر انہیں رہا کیا، بعد میں گھر والوں کو معلوم ہوا کہ ان تینوں لڑکوں کے خلاف پولس نے غیر شراب رکھنے کے الزام میں حراست میں لیا تھا۔

پولس کی اس کاروائی سے بھارتی کسان یونین آگ بگولا ہوگئی اور اس نے اپنے کارکنان کے ساتھ تھانے کا گھراؤ کر دیا۔

کسان یونین کا مطالبہ ہے کہ معاملے کی شفاف تحقیقات ہو اور متعلقہ داروغہ کو معطل کیا جائے۔

کسان یونین نے انتباہ کیا کہ اگر ان کے مطالبات پر غور نہیں کیا گیا تو وہ تھانے میں ڈیرا ڈالے رہیں گے حالانکہ شام تک سی او کی یقین دہانی پر کسانوں کا غصہ کم ہو گیا۔