بارہ بنکی : ارنب گوسوامی کے خلاف تحریری شکایت

ریاست اتر پردیش کے بارہ بنکی میں کانگریسی کارکنان نے ایک نجی نیوز چینل کے سربراہ ارنب گوسوامی کے خلاف مقدمہ درج کرنے کے لئے کوتوالی میں تحریر دی ہے. کانگریسی کارکنان کا الزام ہے کہ ارنب گوسوامی نے ایک لائیو ڈبیٹ کے دوران کانگریس کے کارگذار صدرسونیا گاندھی کے لئے توہین آمیز جملہ کہا ہے. جس کی وجہ سے ان کے جذبات مجروح ہوئے ہیں۔

کانگریسی کارکنان کا کہنا ہے کہ مہاراشٹر کے پالگھر میں ہجومی تشدد میں ہلاک ہوئے سادھو سنتوں کے مسئلہ پر ارنب گوسوامی سماج میں فرقہ پرستی پھیلا رہے ہیں. انہوں نے کہا کہ اس معاملے پرمہاراشٹر کے تمام ذمہ داران کے ردعمل آچکے ہیں. اس کے بعد سونیا کے بیان کا کوئی مطلب نہیں رہ جاتا.

کانگریسیوں نے کہا عجب کشمکش پیدا کی جا رہی ہے کہ جب کانگریس کسی معاملہ پر خاموش رہے تو بولنے کے لئے دباؤ بنایا جاتا ہے اور بولے تو کہا جائے گا کہ سیاست کی جا رہی ہے. انہوں نے کہا ان تمام ترمعاملات کو لیکر ان کے خلاف تحریر دی گئی ہے اور ان کے خلاف مقدمہ درج کرنے کا مطالبہ کیا گیا ہے.