Bank Guard Shoots Customer: ماسک نہ پہننے پر گولی مارنے کا الزام، گارڈ گرفتار

بریلی میں بینک سے پیسے نکالنے پہنچے ایک صارف کو بینک کے گارڈ نے گولی مار دی۔ دراصل صارف نے ماسک نہیں لگایا تھا، جس کی وجہ سے دونوں میں بحث شروع ہوگئی اور سیکورٹی گارڈ نے گولی مار دی۔ پولیس نے گارڈ کو حراست میں لے لیا ہے۔

اترپردیش کے ضلع بریلی جنکشن مارگ پر واقع بینک آف بڑودہ میں تعینات سیکورٹی اہلکار نے ایک صارف کو ماسک نہ لگانے پر ہوئی بحث کے بعد گولی مار دی۔زخمی صارف کو ضلع اسپتال میں داخل کرایا گیا ہے، جبکہ گارڈ کو پولیس نے اپنی حراست میں لے لیا ہے۔

سپرنٹنڈنٹ آف پولیس شہر روندر کمار نے بتایا کہ جمعہ کی دوپہر تقریبا 11:30 بجے راجیش کمار اپنے کسی کام سے بینک پہنچے تھے۔ اسی دوران ان کی بینک برانچ میں موجود سیکورٹی گارڈ کیشو پرساد سے کہا سنی ہوگئی۔ اسی اثنا میں گارڈ نے راجیش کو گولی مار دی۔ راجیش کمار کو فورا بریلی ضلع اسپتال میں داخل کرایا گیا ہے۔

انہوں نے کہا کہ دونوں کےدرمیان بحث ماسک کے سلسلے میں ہوئی یا کسی اور بات پر اس کی جانچ کی جارہی ہے۔

وہیں، حراست میں لئے جانے سے قبل بینک گارڈ نے کہا کہ ’میں بھی زخمی ہوں، آپ میرے شرٹ کے ٹوٹے ہوئے بٹن دیکھ سکتے ہیں۔ میری رائفل بھری ہوئی تھی۔ اور غلطی سے رائفل کا بٹن دب گیا۔

کیشو پرساد نے مزید کہا کہ ’ راجیش ماسک نہیں لگائے ہوئے تھا میں نے اس جانب اس کی توجہ دلائی اس نے ماسک تو لگا لیا لیکن اس کے فورا بعد مجھے گالیاں دینی شروع کردی۔ ہمارے درمیان بحث ہوگئی اور معاملہ گتھم گتھی تک پہنچ گیا اسی اثنا میں غلطی سے اچانک رائفل کا بٹن دب گیا اور یہ حادثہ پیش آیا۔

زخمی راجیش کمار اسپتال میں زیر علاج ہیں جن کی حالت خطرے سے باہر بتائی جاتی ہے جبکہ گارڈ کو پولیس اپنی حراست میں لے کر پوچھ گچھ کررہی ہے۔

یو این آئی