اترپردیش: 17 افراد کو کورونا سے متاثر کرنے والا شخص گرفتار

ریاست اترپردیش کے بنارس میں کورونا وائرس سے متاثر ہونے والے دوا کے تاجر کو صحتیاب ہونے کے بعد ہسپتال سے ڈسچارج کردیا گیا جبکہ اسے پولیس نے گرفتار کرلیا۔

بنارس میں گزشتہ 24 اپریل کو کورونا سے متاثر ہونے والے دوا تاجر کی تازہ رپورٹ منفی آنے کے بعد اسے ڈسچارج کر دیا گیا ہے تاہم ڈسچارج کے فوری بعد پولیس نے گرفتار کرکے جیل بھیج دیا ہے۔

تاجر پر الزام ہے کہ بیرون ملک سفر سے واپس آنے کے بعد اسے ہوم کورنٹائن کی ہدایت دی گئی تھی لیکن اس نے شہر کے مختلف علاقوں میں گھوم کر پولیس اہلکاروں سمیت دیگر افراد کو جوس تقسیم کر رہا تھا اور وبا سے محفوظ رہنے کےلیے کوئی احتیاطی اقدام کرنے سے بھی وہ قاصر رہا۔

وہ مسلسل دوا منڈی میں واقع اپنی دکان پر بھی جارہا تھا اور دوا فروخت کر رہا تھا۔ تاجر کی لاپرواہی کی وجہ سے اس کے اہل خانہ کے 4 افراد کے علاوہ دیگر 13 افراد کورونا سے متاثر ہوئے۔

تاجر کے خلاف دفعہ 151 کے تحت مقدمہ درج کیا گیا اور ہسپتال سے ڈسچارج ہوتے ہی پولیس نے اسے گرفتار کرکے کے جیل بھیج دیا۔