پانچ سال سے مفرور بدمعاش گرفتار

اترپردیش کے ضلع بدایوں کے اسلام نگر علاقے میں پولیس نے پانچ سال سے فرار چل رہے 25 ہزار روپے کے انعامی بدمعاش کو گرفتار کیا ہے۔

بدایوں پولیس نے 25 ہزار روپے کے ایک انعامی بدمعاش کو گرفتار کیا ہے۔ سینئر سپرنٹنڈنٹ آف پولیس اشوک کمار ترپاٹھی نے بتایا کہ بدایوں میں جرائم پیشہ افراد کے خلاف چلائی جارہی خصوصی مہم کے تحت بدھ کی دیر رات چیکنگ کے دوران اسلام نگر پولیس و ایس او جی نے مشترکہ طور سے ایک موٹر سائیکل سوار شخص کو روکنے کی کوشش کی۔

اس نے رکنے کے بجائے پولیس ٹیم پر فائرنگ کردی۔ پولیس پارٹی کی جانب سے خود کے دفاع میں کی گئی فائرنگ میں ملزم گولی لگنے سے زخمی ہوگیا۔

انہوں نے بتایا کہ پوچھ گچھ میں ملزم نے اپنا نام فہیم عرف نبو بتایا ہے وہ دہلی کے نور الہی علاقے کا باشندہ ہے۔ اس کی گرفتاری پر 25 ہزار روپے کے انعام کا اعلان کیا گیا تھا۔ ملزم 2015 سے پولیس کی گرفت سے فرار چل رہا تھا۔

انہوں نے بتایا کہ ملزم سال 2015 میں تھانہ اسلام نگر علاقے میں اپنے ایک رشتہ دار کے گھر آیا تھا۔ اس نے عرس میلے میں ایک سپاہی پر جان لیوا حملہ کیا تھا۔ تبھی سے وہ فرار تھا اور پولیس اس کو تلاش کررہی تھی۔