اترپردیش کے دارالحکومت لکھنؤ میں آج این ایس یو آئی کی جنرل سیکریٹری روچی گپتا نے میڈیا سے مخاطبت کے دوران کہا کہ اب ملک کا نوجوان جواب دے گا کیونکہ بی جے پی نے اپنا ایک بھی وعدہ پورا نہیں کیا۔
روچی گپتا نے کہا کہ اس بار ملک کا نوجوان مودی حکومت سے جواب چاہتا ہے کہ 2014 میں کیے گئے ان کے وعدوں کا کیا ہوا؟
گپتا کا کہنا ہے کہ کمیٹی اس نتیجے پر پہنچی ہے کہ ملک کے نوجوانوں کو نہ ہی روزگار ملا اور نہ ہی انہیں کسی قسم کی حکومتی امداد حاصل ہوسکی جبکہ نریندر مودی نے کہا تھا کہ ان کی حکومت ہر سال 2کروڑ نوجوانوں کو روزگار دے گی۔
جنرل سیکرٹری نے کہا کہ کانگریس نے غریب طبقے کے لوگوں کو سالانہ 72 ہزار روپے دینے کی بات کہی ہے اور نوجوانوں کے تعلیم کے لیے بھی جی ڈی پی کا 6 فیصد خرچ کرنے کا بھی اعلان اپنے انتخابی منشور میں کیا ہے۔
جبکہ مودی سرکار نے یو جی سی کے فنڈ میں 55 فیصد کی کٹوتی کردی ہے۔ اس وجہ سے طالب علم کو فیس اور دیگر کاموں میں کافی روپیہ خرچ کرنا پڑ رہا ہے۔