علی گڑھ:علی گڑھ مسلم یونیورسٹی (اے ایم یو) کیمپس کے علامہ اقبال ہال کے باہر ہفتہ کی دیر رات 12ویں کلاس کے ایک طالب علم پر تیز دھار ہتھیار سے حملہ کرنے کا معاملہ سامنے آیا ہے۔ واقعہ کی اطلاع ملنے کے بعد پہنچے اے ایم یو حکام نے زخمی طالب علم کو جے این میڈیکل کالج میں داخل کرایا، جہاں اس کا علاج چل رہا ہے۔ بتایا جا رہا ہے کہ حملہ آور بھی طالب علم ہے۔ متاثرہ طالب علم کی شکایت پر سول لائن تھانہ پولیس کیس کی تفتیش میں مصروف ہے۔ شہر کے سول لائن تھانہ علاقے میں واقع علی گڑھ مسلم یونیورسٹی میں اس وقت ہلچل مچ گئی، جب علامہ اقبال ہال کے باہر ہفتہ کی رات بارہویں جماعت میں پڑھنے والے عبدالرزاق نامی طالب علم پر چاقو سے حملے کی اطلاع ملی۔
اس اطلاع پر اے ایم یو انتظامیہ کے اعلیٰ افسران موقع پر پہنچے اور طالب علم کو تشویشناک حالت میں جے این میڈیکل کالج میں داخل کرایا۔ بتایا جاتا ہے کہ عبدالرزاق جو کہ اصل میں ضلع غازی پور کا رہائشی ہے کا علامہ اقبال ہال میں اپنے کچھ ساتھیوں سے جھگڑا ہو گیا تھا۔ الزام ہے کہ بہار کے ایک طالب علم نے تیز دھار ہتھیار سے حملہ کیا۔ جس میں عبدالرزاق شدید زخمی ہوگیا۔ جس سے اے ایم یو کیمپس میں افراتفری پھیل گئی۔