بنارس میں تقریباً 50 فیصد مسلمانوں نے عید الفطر کی نماز ادا کی

گزشتہ شام یعنی 12 مئی کو بنارس میں مرکزی رویت ہلال کمیٹی، جس کے صدر قاضی غلام یٰسین ہیں۔ انہوں نے اعلان کیا تھا کہ 13 مئی کو عید الفطر کی نماز ادا کی جائے گی۔ جس کے نتیجہ میں آج یعنی 13 مئی کو بنارس کے تقریباً 50 فیصد مسلمانوں نے نماز عید الفطر ادا کی ہے۔

بنارس کے کچھ علاقوں میں زیادہ تر لوگوں نے نماز عید الفطر ادا کرلی ہے اور عید منا رہے ہیں جبکہ اجتماعی رویت ہلال کمیٹی بنارس نے اعلان کیا تھا کہ 14 مئی کو عید الفطر کی نماز ادا کی جائے گی جس پر بنارس کے تقریباً 50 فیصد افراد 14مئی کو یعنی بروز جمعہ کو عید الفطر کی نماز ادا کریں گے۔

بنارس کے للا پورہ علاقے کی باڑہ والی مسجد کے خطیب و امام محسن رضا نے ای ٹی وی بھارت سے بات کرتے ہوئے کہا کہ شہر قاضی نے دیر شب میں اعلان کیا تھا کہ 13 مئی کو عید الفطر کی نماز ادا کی جائے گی، ان کے حکم کی تعمیل کرنے والوں نے عید الفطر کی نماز ادا کی ہے جب کہ اجتماعی رویت ہلال کمیٹی بنارس نے اعلان کیا تھا کہ 14 مئی کو عید الفطر کی نماز ادا کی جائے گی وہ لوگ ابھی انتظار کر رہے ہیں۔

بنارس کے 50 فیصد علاقوں میں عید الفطر کی نماز ادا کرلی گئی ہے اور لوگ عید کی مبارکباد پیش کر رہے ہیں۔ لاک ڈاؤن اور کورونا وائرس کی وجہ سے عوام سڑکوں پر کم نظر آرہے ہیں اور گھروں میں ہی ایک دوسرے کو مبارکباد دے رہے ہیں۔

عید الفطر کی نماز

خاص بات یہ ہے کہ بیشتر مسجدوں میں کورونا وائرس کی گائڈ لائنس پر عمل کرتے ہوئے نماز عید الفطر ادا کی گئی ہے جس میں پانچ لوگوں نے سماجی فاصلہ کے ساتھ عید الفطر کی نماز ادا کی ہے۔