LuLu Mall namaz row: لولو مال میں نماز پڑھنے کے الزام میں ایک اور شخص گرفتار

لکھنئو پولیس نے لولو مال میں بغیر اجازت نماز ادا کرنے کے الزام میں پانچویں شخص کو گرفتار کر لیا ہے۔ اس سے قبل 4 لوگوں کو گرفتار کیا جاچکا ہے۔ LuLu Mall namaz row

لکھنئو:دارالحکومت لکھنئو کے لولو مال میں بغیر اجازت نماز پڑھنے کے الزام میں لکھنئو پولیس نے محمد عادل نام کے شخص کو گرفتار کیا۔ پولیس کے مطابق عادل کو چوپاٹیہ علاقے سے گرفتار کیا گیا ہے، جب کہ وہ پرانے شہر کا رہنے والا ہے۔ واضح رہے کہ 10 جولائی کو لولو مال کا افتتاح ہوا تھا، 12 جولائی کو بغیر اجازت مال میں نماز ادا کی گئی تھی، جس کا ویڈیو سوشل میڈیا خوب وائرل ہوا تھا، وہیں مال کے پی آر او نے 14 جولائی اس معاملے میں مقدمہ درج کرایا تھا، جس کے بعد سے ہی لکھنئو پولیس نماز پڑھنے والے لوگوں کو تلاش کررہی تھی۔ اس معاملے میں اب تک پولیس نے نامزد کیے گئے 9 لوگوں میں چار افراد کو گرفتار کرلیا تھا، جو جیل میں بند ہیں۔ وہیں اب پولیس نے پانچویں شخص کو بھی گرفتار کرلیا ہے، مزید چار لوگوں کو تلاش جاری ہے۔

واضح رہے کہ گزشتہ منگل کو پولیس نے مال میں نماز پڑھنے کے الزام میں 4 لوگوں کو گرفتار کیا تھا، کئی سخت گیر ہندو تنظیموں نے الزام لگایا تھا کہ لولو مال میں نماز پڑھنے کے پیچھے ایک بڑی سازش رچی جارہی ہے۔ پولیس انتظامیہ نے اس معاملے میں سازش کی قیاس آرائیوں کی تردید کی تھی۔

اے ڈی سی پی ساؤتھ راجیش شری واستو نے بتایا تھا کہ گرفتار کیے نوجوانوں نے پوچھ گچھ میں بتایا کہ عصر کی نماز کا وقت ہوگیا تھا۔ اسی لیے مال میں جگہ ڈھونڈ کر وہ دوسری منزل پر نماز پڑھنے چلے گئے۔ سکیورٹی اہلکاروں نے انہیں روکا، تو نوجوانوں نے ان سے درخواست کی تھی، کئی مرتبہ درخواست کرنےکے بعد لولو مال کے گارڈ نے انہیں نماز پڑھنے کی اجازت دی تھی۔ نماز کے بعد تمام نوجوان آٹو سے واپس چلے گئے تھے۔ گرفتار نوجوانوں نے بتایا کہ انہیں یہ نہیں پتہ تھا کہ نماز پڑھنے پر اتنا تنازع ہو جائے گا۔