علی گڑھ:علی گڑھ مسلم یونیورسٹی (اے ایم یو) کے وائس چانسلر پروفیسر محمد گلریز نے یونیورسٹی کیمپس میں بجلی تقسیم نظام کا معائنہ کیا اور سنٹرل سب اسٹیشن بی اور 33 کے وی سب اسٹیشن (نزد پولی ٹیکنک) میں نو تعمیر شدہ پاور ڈسٹری بیوشن اسٹیشنوں کا افتتاح کیا۔ انہوں نے بجلی شعبہ کے کاموں کی ستائش کی۔ علی گڑھ مسلم یونیورسٹی، بجلی شعبہ کو ریاست اترپردیش پاور کارپوریشن سے ایک ہی جگہ پر 33 کے وی بجلی کی سپلائی ملتی ہے اور اس کے بعد کے نیٹ ورک کا بندوبست یونیورسٹی کا بجلی شعبہ کرتا ہے۔ دو مختلف وولٹیج سطح 11 کے وی (ایچ وی) اور 440 وی (ایل وی) پر بجلی کی تقسیم ہوتی ہے۔
اے ایم یو بجلی شعبہ کے ممبر انچارج پروفیسر محمد ریحان نے بتایا کہ بجلی کی بڑھتی ہوئی ضرورت کے پیش نظر، بجلی تقسیم نظام میں وسیع پیمانے پر اصلاح و اضافہ کیا گیا ہے۔ حالیہ برسوں میں بجلی سپلائی کے سلسلہ میں کئے گئے اہم کاموں کے بارے میں بتایا جن میں پورے ایچ وی نیٹ ورک کے لیے انڈرگراؤنڈ کیبلنگ اور اضافی کیبلوں کی فراہمی شامل ہے۔
ایل وی نیٹ ورک کے لئے بھی زیرزمین کیبل بچھانے کا کام کیا جارہا ہے، جس میں مولانا آزاد لائبریری، کینیڈی ہال، اسٹریچی ہال اور ایس ایس نارتھ اور میڈیکل کالونی وغیرہ کے آس پاس کے علاقوں سے متعلق کام مکمل ہوچکا ہے، جب کہ عبداللہ ہال، ویمنس کالج، آئی جی ہال، طبیہ کالج اور احمدی اسکول میں ہونے والی بجلی سپلائی سے متعلق زیر زمین کیبل بچھانے کا کام علی گڑھ اسمارٹ سٹی لمیٹیڈ کے تعاون سے جاری ہے۔