Stray Dog Attack In AMU آوارہ کتے کے حملے میں اے ایم یو رسرچ اسکالر زخمی، کیمپس میں خوف کا ماحول

علی گڑھ مسلم یونیورسٹی (اے ایم یو) کیمپس میں رسرچ اسکالر خالد حسن کو آوارہ کتوں نے حملہ کرکے شدید زخمی کردیا۔ کچھ روز قبل ہی اے ایم یو کیمپس میں صبح نماز فجر کے بعد تقریبا 65 سالہ ریٹائرڈ ڈاکٹر سفدر علی کو آوارہ کتوں نے حملہ کرکے ہلاک کر دیا تھا۔

علی گڑھ: عالمی شہرت یافتہ علی گڑھ مسلم یونیورسٹی کیمپس میں آوارہ کتوں کی تعداد اور ان کے جان لیوا حملے بڑھتے ہی جا رہے ہیں۔ جس کے سبب کیمپس میں ڈر اور خوف کا ماحول ہے۔ 16 اپریل بعد نماز فجر سر سید ہاوس کے میدان میں تقریبا 65 سالہ ڈاکٹر صفدر علی پر آوارہ کتوں نے حملہ کرکے انہیں ہلاک کر دیا۔ جس کے بعد 17 اپریل کو علی گڑھ میونسپل کارپوریشن کی جانب سے یونیورسٹی کیمپس میں کتوں کو پکڑنے کے لئے تین ٹیمیں تشکیل دی گئی تھی اور دس آوارہ کتوں کو بھی پکڑا گیا تھا، باوجود اس کے کتوں نے حملہ کرکے رسرچ اسکالر کو شدید زخمی کردیا۔

دراصل گزشتہ شعبہ سیاست کے رسرچ اسکالر خالد حسن اپنے ہال کے باہر چہل قدمی کر رہے تھے، اسی دوران دو آوارہ کتوں نے ان پر حملہ کر دیا حالانکہ خالد حسن نے کتوں کو بھگانے کی کوشش کی لیکن وحشی کتوں نے خالد پر حملہ کر دیا۔ حملے کے دوران مزید پانچ کتے آگئے اور خالد کو گرا کر شدید زخمی کر دیا۔

آوارہ کتوں نے خالد پر پنجوں اور دانتوں سے حملہ کر دیا، جس کے نشانات جسم پر صاف دیکھے جا سکتے ہیں۔ خالد اٹھ کر اپنے آپ کو بچانے کے لیے ہاسٹل کے کامن روم کی طرف بھاگا لیکن کتے اس کا پیچھا کرنے سے باز نہ آئے، وہ کامن روم میں داخل ہو کر جان بچانے میں کامیاب رہے۔ زخمی خالد نے بتایا کہ کتوں نے سر کے علاوہ پورے جسم کو دانتوں اور پنجوں سے کاٹ کر زخمی کر دیا ہے۔

خالد نے شرٹ، پینٹ اور چپل پہن رکھی تھی۔ حالانکہ میونسپل کارپوریشن نے اے ایم یو میں مہم چلا کر دس کتوں کو پکڑا ہے لیکن پھر بھی خطرناک کتوں نے اے ایم یو کیمپس میں پناہ لی ہوئی ہے۔ خالد نے بتایا کہ اس نے مارچ میں ہی پی ایچ ڈی میں داخلہ لیا تھا، جب کتے بھونک رہے تھے تب میں بہت ڈر گیا اور میرے ذہن میں کتوں کے حملے سے موت کا خیال بھی آنے لگا۔

خالد نے بتایا کہ آوارہ کتوں کے حملے سے کیمپس میں ڈر کا ماحول ہے اور طلباء میں خوف ہے۔ دیر رات مولانا آزاد لائبریری سے طلبہ اپنے ہال آتے جاتے ہیں۔ اس دوران راستے میں کئی کتوں کا سامنا ہو جاتا ہے، جس کی وجہ سے خوف کا ماحول ہے۔ خالد نے کہا کہ اے ایم یو انتظامیہ اور میونسپل کارپوریشن کو کتوں کے تعلق سے سخت کارروائی کرنی چاہئے۔

انہوں نے کہا کہ اگر طلباء کو سیکورٹی نہیں دی گئی تو طلباء کو پریشانی کا سامنا کرنا پڑے گا۔ یونیورسٹی پراکٹر نے ٹیلی فون پر اطلاع دیتے ہوئے بتایا کہ آوارہ کتوں کے دوبارہ حملے کے بعد علی گڑھ میونسپل کارپوریشن سے رابطہ کیا گیا ہے اور مزید آوارہ کتوں کو پکڑنے کی بات کہی گئی ہے۔ یونیورسٹی کیمپس کو آوارہ کتوں سے محفوظ بنانے کی ہر ممکن کوشش کی جائے گی۔