بالی وڈ کے معروف اداکار دلیپ کمار (محمد یوسف خان) کا آج ممبئی میں انتقال ہوگیا۔ اطلاع کے مطابق انہوں نے صبح تقریبا سات بجے ممبئی کے ہندوجا ہسپتال میں آخری سانس لی۔
دلیپ کمار (محمد یوسف خان) کا علی گڑھ مسلم یونیورسٹی سے گہرا تعلق تھا۔ دلیپ کمار اے ایم یو کے کورٹ ممبر بھی رہے اور اے ایم یو نے 26 فروری 2002 میں دلیپ کمار کو ڈی لٹ کی ڈگری سے بھی نوازا۔ اس وقت اے ایم یو کے وائس چانسلر حامد انصاری اور پرو چانسلر ممتاز احمد خان تھے۔
اے ایم یو شعبہ رابطہ عامہ کے سابق پی آر او اور اردو اکیڈمی کے سابق ڈائریکٹر ڈاکٹر راحت ابرار نے بتایا کہ دلیپ کمار کا اے ایم یو سے دو حیثیت سے تعلق رہا۔ پہلا تو وہ اے ایم یو میں 1986۔87 میں کورٹ کے ممبر رہے۔ جبکہ دوسرا اے ایم یو نے 26 فروری 2002 کو تقسیم اسناد میں دلیپ کمار کو ڈی لٹ کی ڈگری سے نوازا تھا۔ لیکن بدقسمتی سے طبیعت خراب ہونے کی وجہ سے دلیپ کمار تشریف نہیں لا پائے تھے جس کی وجہ سے انہوں نے یونیورسٹی کو خط لکھ کر خوشی کا اظہار کیا تھا۔
مزید پڑھیں:دلیپ کُمار سُپرد خاک
دلیپ کمار کے انتقال پر اے ایم یو کے وائس چانسلر پروفیسر طارق منصور نے بھی تعزیت کا اظہار کیا ہے۔