بارہ بنکی: امبیڈکر کا مجسمہ توڑے جانے سے دلت تنظیموں میں غصہ

ریاست اتر پردیش کے بارہ بنکی کے مسولی تھانہ حلقے کے شہاب پور میں ڈاکٹر امبیڈکر کے مجسمے کو توڑے جانے کے معاملے میں پولیس کے رویے سے دلت تنظیموں میں غصہ بڑھ گیا ہے۔ اسی کو لیکر دلت تنظیموں کے کارکنان نے ڈی ایم دفتر کے سامنے مظاہرہ کیا اور پولیس و انتظامیہ کے خلاف نعرے بازی کی۔

قابل غور ہے کہ شہابپور قصبہ میں برسوں سے لگے ڈاکٹر امبیڈکر کے مجسمے کو سرپسند عناصر نے 8/9 اگست کی رات تین ٹکڑے کر دی تھے۔

مجسمہ توڑے جانے کے خلاف دلت تنظیموں نے وہاں مظاہرہ کیا تھا۔ اس کے بعد پولیس نے نیا مجسمہ لگانے کی یقین دہانی کراکر معاملہ ختم کرا دیا تھا۔

لیکن بعد میں ٹوٹے ہوئے مجسمے کو ہی پولیس نے جوڑ دیا۔ پولیس کی اس کارروائی سے دلت تنظیمیں مطمئن نہیں ہوئیں۔

منگل کے روز بی ایس پی اور بھیم آرمی سمیت مختلف دلت تنظیموں کے کارکنان نے کلکٹریٹ میں مظاہرہ کیا اور میمورنڈم دیا۔

دلت کارکنان کا مطالبہ ہے کہ، 'ڈاکٹر امبیڈکر کا نیا مجسمہ قائم کیا جائے اور شر پسند عناصر کے خلاف سخت کاروائی کی جائے۔'

دلت تنظیموں نے انتباہ کیا ہے کہ اگر ان کے مطالبات پر غور نہیں کیا گیا تو بڑا مظاہرہ کیا جائے گا۔

وہیں پولیس سپرنٹنڈنٹ ڈاکٹر اروند چترویدی نے یقین دہانی کرائی ہے کہ، 'جلد ہی ملزمین کو گرفتار کر لیا جائے گا اور نیا مجسمہ قائم کرایا جائے گا۔'