علی گڑھ مسلم یونیورسٹی کی شاخ کے لیے فنڈ منظور

ریاست اترپردیش کے ضلع علی گڑھ میں واقع علی گڑھ مسلم یونیورسٹی کے ملاپورم اور مرشدآباد شاخ کے لیے وزارت برائے اقلیتی امور نے 100 کروڑ 99 لاکھ کا فنڈ منظور کیا ہے۔

ای ٹی وی بھارت سے خصوصی گفتگو کرتے ہوئے علی گڑھ مسلم یونیورسیٹی کے شعبہ رابطہ عامہ کے اسسٹنٹ انچارج ڈاکٹر راحت ابرار نے بتایا کہ 'وزارت برائے اقلیتی امور نے ریاست کیرالا کے ملاپورم اور مغربی بنگال کے مرشد آباد میں علی گڑھ مسلم یونیورسٹی کی شاخ میں گرلز اور بوائز ہاسٹل کی تعمیر کے لیے 100 کروڑ 90 لاکھ روپے کا فنڈ منظور کیا ہے۔ یہ رقم "پردھان منتری جن وکاس کاریہ کرم" کے تحت منظور کی گئی ہے۔

ڈاکٹر راحت ابرار نے مزید بتایا کہ 'وزارت نے مذکورہ رقم سے 30.29 کروڑ روپے کی پہلی قسط جاری بھی کر دی ہے۔'

وائس چانسلر پروفیسر طارق منصور نے شاخ میں طلبا و طالبات کی سہولیات کی تنگی کی پیش نظر ہوسٹل کی تعمیر کے لیے وزارت برائے اقلیتی امور کو مالی تعاون کی تجویز ارسال کی تھی۔