اے ایم یو کے ڈاکٹر ذاکر حسین کالج آف انجنیئرنگ اینڈ ٹیکنالوجی سے گزشتہ برس بی ٹیک کی تعلیم حاصل کرنے والے عمران پرویز کو سولر پی وی سسٹم مکسیمم پاور پوائنٹ ٹریکنگ تکنیک کا نادر تصور پیش کرنے کے لئے 'ٹائفون ایچ آئی ایل ڈیزرٹیشن ایوارڈ 2021' سے سرفراز کیا گیا اور بطور انعام دس ہزار روپے دیے گئے۔
عمران کے تحقیقی مقالے متعدد علمی و تحقیقی مجلوں میں شائع ہوئے ہیں۔
انہوں نے الیکٹریکل انجینئرنگ شعبہ کے استاد ڈاکٹر محمد طارق اور ڈاکٹر عادل سرور کی رہنمائی میں تحقیق کی۔ جبکہ بی ٹیک سال آخر کا پروجیکٹ محمد زید کی نگرانی میں مکمل کیا۔
عمران پرویز کو مبارکباد پیش کرتے ہوئے پروفیسر پرویز مستجاب (ڈین، فیکلٹی آف انجینئرنگ اینڈ ٹیکنالوجی) نے کہا کہ یہ ایوارڈ ملنا خوشی کی بات ہے کیونکہ اس سے حوصلہ بڑھتا ہے اور مزید بہتر کرنے کی ترغیب ملتی ہے۔
الیکٹریکل انجینئرنگ شعبہ کے سربراہ پروفیسر سلمان حمید نے کہا کہ عمران کا کام بہتر ہے اور شعبہ کے انڈر گریجویٹ طلبہ مستند و معیاری رسائل میں اپنی تحقیق شائع کرا رہے ہیں جو نوجوان اساتذہ کی کاوشوں کے مرہون منت ہے۔
انہوں نے ڈاکٹر محمد طارق (انچارج، ایچ آئی ایل لیب، ای ای ڈی) کی بھی ستائش کی جو طلبہ کی رہنمائی کر رہے ہیں جس کی بدولت وہ ہارڈ ویئر ان دا لوپ (ایچ آئی ایل) ٹیکنالوجی کا خاطر خواہ استعمال کر رہے ہیں۔
