سماجوادی پارٹی کے دفتر پر ایک پریس کانفرنس سے خطاب کرتے ہوئے سماج وادی پارٹی کے قومی صدر اور سابق وزیر اعلیٰ اکھلیش یادو نے ریاست کی بی جے پی حکومت کو شدید تنقید کا نشانہ بنایا۔ انہوں نے کہا کہ یوگی حکومت انتقامی جذبے کے تحت جوہر یونیورسٹی کے خلاف کارروائی کر رہی ہے۔
انہوں نے کہا کہ سماجوادی پارٹی حکومت دوبارہ آنے پر جوہر یونیورسٹی پہلے سے بھی اچھی بنے گی۔
اکھلیش یادو نے کہا کہ ریاست میں لگاتار سرکاری نوکریاں کم ہو رہی ہیں۔ با صلاحیت نوجوان بے روزگار گھوم رہے ہیں۔ انہوں نے کہا کہ حکومت نے آن لائن تعلیم کے لیے کوئی بھی مناسب انفراسٹرکچر نہیں بنایا۔ انہوں نے کہا کہ بی جے پی حکومت سودیشی کا نعرہ لگا کر غیر ملکی کمپنیوں کو لوٹنے کا موقع دے رہی ہے۔
کسانوں کے معاملے پر گفتگو کرتے ہوئے انہوں نے کہا کہ بھارتیہ جنتا پارٹی کسانوں کے معاملے پر مسلسل جھوٹ بول رہی ہے۔ بھارتیہ جنتا پارٹی کسانوں کی نہیں بلکہ جھوٹ کی پارٹی ہے۔
ویب سیریز 'تانڈو' پر مقدمے کے سوال پر اکھلیش یادو نے کہا کہ 'تانڈو' کے نام پر ریاستی حکومت تانڈو مچا رہی ہے۔ یوپی کی پولیس ممبئی جا رہی ہے اور ممبئی کی پولیس اترپردیش آرہی ہے۔
اکھلیش یادو نے کہا کہ اترپردیش خواتین کے خلاف جرائم، بچوں کے خلاف جرائم، فرقہ وارانہ تشدد، فرضی انکاؤنٹر، مقدمے واپس لینے، بےروزگاری، دوسروں کا نام اپنا بنوانے میں، رنگ بدلنے میں، گنے کی قیمت نہ ادا کرنے میں، شراب سے اموات کے معاملے میں، گھر گرانے کے معاملے میں اور جھوٹ بولنے کے معاملے میں نمبر ون ہے۔
سابق وزیر اعلیٰ نے کہا کہ ریاست کے وزیر اعلیٰ اور نائب وزیر اعلیٰ پر قتل اور فساد کرانے کے الزام لگے، لیکن اس حکومت نے اپنے اوپر سے سارے مقدمات واپس لے لیے۔
مزید پڑھیں:
اس موقع پر ریاست کے کئی اضلاع سے تعلق رکھنے والی دیگر پارٹیوں کے نوجوانوں نے سماج وادی پارٹی کی رکنیت حاصل کی۔ نئے کارکنان کا خیرمقدم کرتے ہوئے ریاست کے سابق وزیر اعلی اکھلیش یادو نے کہا کہ نوجوانوں کی آمد کے ساتھ سماج وادی پارٹی یقینی طور پر مضبوط ہوگی۔
