دیوبند: نابالغ لڑکی سے جنسی زیادتی کرنے کا الزام

دیوبند کے محلہ ابوالمعالی کے رہنے والے ایک شخص نے محلہ کے ہی ایک شخص پر اپنی نابالغ لڑکی کے ساتھ جنسی زیادتی کرنے کا الزام عائد کرتے ہوئے تھانہ دیوبند میں تحریر دے کر کارروائی کا مطالبہ کیا ہے۔ پولیس نے تحریر کی بنیاد پر مقدمہ قائم کر کے تفتیش شروع کر دی ہے۔

ریاست اترپردیش کے ضلع سہارنپور کے دیوبند میں ایک نابالغ لڑکی کے ساتھ جنسی زیادتی کرنے کا واقعہ پیش آیا ہے۔

موصولہ اطلاع کے مطابق مذکورہ محلہ کے رہنے والے محمد اسلم نے تحریر دیتے ہوئے بتایا کہ اس کی نابالغ لڑکی محلہ میں ہی ایک گھر میں گذشتہ دو برس سے گھریلو کام کرتی ہے۔ گذشتہ روز مکان مالک اس کی لڑکی کو عیدگاہ روڈ پر واقع فارم ہاؤس پر صاف صفائی کے بہانے لے گیا اور اس نے وہاں پر لڑکی کو اسلحہ دکھا کر جان سے مارنے کی دھمکی دیتے ہوئے اس کے ساتھ جنسی زیادتی کی۔

ملزم نے لڑکی کو دھمکی دیتے ہوئے کہا کہ اگر اس نے اس بات کا کسی سے ذکر کیا تو اسے جان سے مار دے گا یا پھر غنڈوں سے اغوا کرا دے گا۔

متاثرہ شخص نے بتایا کہ جب میری لڑکی بدحواس حالت میں گھر پہنچی تو میں نے اس سے دیر سے آنے کی وجہ پوچھی تو اس نے روتے ہوئے پورا واقعہ بتایا۔

نابالغ لڑکی سے جنسی زیادتی کرنے کا الزام

میری لڑکی اس وقت بھی بہت خوف زدہ ہے۔ متاثرہ شخص نے تھانہ میں تحریر دیتے ہوئے کہا کہ میری لڑکی کی میڈیکل جانچ کرا کر مقدمہ درج کیا جائے۔

پولیس نے میڈیکل جانچ کرانے کے ساتھ ساتھ مذکورہ شخص کے خلاف مختلف دفعات کے تحت مقدمہ درج کر کے تفتیش شروع کر دی ہے۔