مرادآباد کلکٹریٹ کے روبرو عام آدمی پارٹی کا احتجاجی مظاہرہ

ریاست اتر پردیش میں خواتین کے خلاف بڑھتے جرائم پر تشویش کا اظہار کرتے ہوئے مرادآباد کلکٹریٹ کے روبرو عام آدمی پارٹی کی جانب سے احتجاجی مظاہرہ کیا گیا۔

مرادآباد کلکٹر دفتر کے باہر عام آدمی پارٹی کے کارکنوں نے ریاست میں خواتین کے خلاف جرائم میں اضافہ پر زبردست احتجاجی مظاہرہ کیا اور ڈی ایم کے ذریعہ صدر جمہوریہ کو ایک میمورنڈم روانہ کیا گیا۔

عام آدمی پارٹی کی جانب سے صدر جمہوریہ کو روانہ کئے گئے میمورنڈم میں اترپردیش میں خواتین اور لڑکیوں کے ساتھ ہورہے جنسی زیادتی و قتل کے واقعات میں اضافہ پر تشویش کا اظہار کیا گیا اور ایسے واقعات کو روکنے میں ناکامی پر یوگی حکومت کو برطرف کرنے کا مطالبہ کیا۔

میمورنڈم میں بتایا گیا کہ ریاست میں امن و امان کی صورتحال ابتر حالت میں ہے اور مجرمین کو قانون کا خوف نہیں ہے۔ آئے دن خواتین کے ساتھ جنسی زیادتی اور قتل کے واقعات رونما ہورہے ہیں جبکہ یوگی حکومت ایسے واقعات کو روکنے میں پوری طرح ناکام ہوگئی ہے۔ میمورنڈم میں یوگی حکومت پر مجرمین کو پناہ دینے کا بھی الزام عائد کیا گیا اور بتایا گیا کہ جنسی زیادتی کی شکار خواتین انصاف نہ ملنے کی وجہ سے متعدد خواتین نے خودکشی کرلی ہے۔