عآپ نے شاہ عالم الفت کو یوپی اقلیتی سیل کا نائب صدر منتخب کیا

عام آدمی پارٹی اترپردیش کے اقلیتی ووٹ تک اپنی رسائی کی ہر ممکن کوشش کر رہی ہے۔ پارٹی نے حال ہی میں اقلیتی سیل کی تشکیل کی ہے۔ عام آدمی پارٹی کے مئو ضلع صدر رہے شاہ عالم الفت کو اترپردیش اقلیتی سیل کا نائب صدر منتخب کیا گیا ہے۔

عام آدمی پارٹی اترپردیش اسمبلی انتخابات 2022 کے لئے ابھی سے کمر بستہ ہو رہی ہے۔ اترپردیش کے اقلیتی طبقہ کے تقریباً 22 فیصد ووٹروں پر پارٹی کی خاص توجہ ہے۔ عام آدمی پارٹی نے اپنی اقلیتی سیل کو مضبوط کرنے کے لئے عہدیداروں کی تقرری بھی کر دی۔ اس ضمن میں پارٹی نے مئو سے تعلق رکھنے والے شاہ عالم الفت کو اترپردیش اقلیتی سیل کا نائب صدر منتخب کیا ہے۔

پارٹی نے یہ قدم مشرقی اترپردیش میں مقیم بنکروں کی کثیر آبادی کے مد نظر اٹھایا ہے۔ گزشتہ ایک سال سے عام آدمی پارٹی بنکروں کے مختلف مسائل پر اترپردیش کی یوگی حکومت کے خلاف مہم جاری رکھے ہوئے ہے۔

خاص طور پر بنکروں کی بجلی سبسڈی کے مسئلہ پر کئی بار احتجاجی مظاہرے کئے گئے۔ اترپردیش حکومت اس مسئلہ کو پوری طرح حل کرنے میں ابھی تک ناکام رہی ہے۔ اس کےعلاوہ اترپردیش میں بیسک تعلیم کی زبوں حالی کو بھی عام آدمی پارٹی نے اہم مدعہ بنا رکھا ہے۔

سی اے اے اور این آر سی احتجاج کے خلاف اترپردیش حکومت کی شدید کاروائی بھی سوالوں کے گھیرے میں ہے۔ عام آدمی پارٹی اس مدعے کو بھی زور شور سے اٹھا رہی ہے۔

عام آدمی پارٹی اترپردیش اقلیتی سیل کے نائب صدر شاہ عالم الزام عائد کرتے ہیں کہ اقلیتی طبقہ کے نوجوانوں پر یوگی حکومت جانبدارانہ کاروائی کر رہی ہے۔ عام آدمی پارٹی نے اترپردیش کے آئندہ پنچایت انتخابات میں بھی اپنے امیدوار اتارنے کا اعلان کیا ہے۔