سمت مگوترا نے مرکزی حکومت کو تنقید کا نشانہ بنایا

کانگریس کے سینیئر لیڈر سمت مگوترا نے پریس کانفرنس کے دوران مرکزی حکومت کو تنقید کا نشانہ بناتے ہوئے کہا کہ مرکزی حکومت نے جموں و کشمیر میں 70 مرکزی وزرا کا دورہ کرایا، جس کا مقصد جموں و کشمیر کے عوام کو درپیش مسائل کو حل کرنا تھا لیکن مرکزی حکومت کی طرف سے آنے والے وزرا محض دکھاوے کے لیے آئے تھے۔

کانگریس رہنما مگوترا نے صحافیوں سے خطاب کرتے ہوئے کہا کہ جب بھی کسی وزیر کا ادھم پور میں دورہ ہوتا تھا۔ ضلع انتظامہ افسر کو پروٹوکول کے تحت وزیر کے ساتھ جانا پڑتا تھا، جس کی وجہ سے دور دراز سے آنے والے لوگوں کو دفاتر جانے میں پریشانیوں کا سامنا کرنا پڑتا تھا۔

مگوترہ نے کہا کہ ادھم پور میں گذشتہ کئی مہینوں سے پانی کی قلت ہے، جس کی وجہ سے نوراترا کے دوران لوگوں کو خاص طور پر خواتین کو کافی مشکلات کا سامنا کرنا پڑ رہا ہے۔ ادھم پور کا دورہ کرنے والے وزرا پانی کی قلت پر قابو پانے یا کوئی نیا پروجیکٹ دیتے تب ہم اسے آوٹ ریچ پروگرام مانتے۔

مگوترہ نے بتایا کہ ہم نے واٹر سپلائی ڈپارٹمنٹ کے عہدیداروں سے بات کی تو یہ جانکاری ملی کہ محکمہ نے 90 کروڑ کا پروجیکٹ بھیجا ہے تاکہ ادھم پور کے لیے پانی کا ایک نیا یونٹ تیار کیا جاسکے۔ لیکن یہاں سے دو بار جیتنے والے رکن پارلیمان پتہ نہیں کیس کا انتظار کر رہے ہیں۔

انہوں نے لیفٹیننٹ گورنر سے مطالبہ کرتے ہوئے کہا کہ محکمہ کی طرف سے بھیجے گئے 90 کروڑ کے منصوبے کو جلد منظور کیا جائے تاکہ ہمارے ادھم پور کے لوگوں کو پانی کی قلت کا سامنا نہ کرنا پڑے۔