ضلع ادھمپور کے سلاتھیا چوک میں بدھ کی دوپہر پر اسرار دھماکے Blast at Salathia Chowk, Udhampur میں ایک شخص کی موت واقع ہو گئی جبکہ دھماکے میں 14افراز زخمی ہوگئے۔
عینی شاہدین کے مطابق سلاتھیا چوک میں قریب پونے ایک بجے زور دار دھماکہ ہوا جس کے سبب متعدد افراد زخمی ہو گئے۔ زخمیوں کو فوری طور ضلع اسپتال پہنچایا گیا جہاں ایک شخص زخموں کی تاب نہ لاکر فوت ہو گیا۔
اطلاعات کے مطابق دھماکے کی آواز قریب دو کلومیٹر دائرے تک سنائی دی گئی۔ دھماکے کے فوراً بعد حفاظتی اہلکار موقع پر پہنچے اور انویسٹی گیشن شروع کر دی۔ اے ڈی جی پی، جموں مکیش سنگھ نے ذرائع ابلاغ کے نمائندوں کے ساتھ بات کرتے ہوئے کہا کہ دھماکے سے متعلق تفتیش جاری ہے تاہم ابتدائی تحقیقات سے آئی ای ڈی بلاسٹ معلوم ہوتا ہے۔
انہوں نے کہا کہ انویسٹی گیشن رپورٹ سامنے آنے کے بعد ہی اصل صورتحال معلوم ہو پائے گی۔
قابل ذکر ہے کہ ضلع ادھمپور خصوصا سلاتھیا چوک سیکورٹی کے اعتبار سے کافی حساس علاقہ تصور کیا جاتا ہے۔ فوج کا ناردرن کمانڈ ہیڈ آفس اور ائر فورس اسٹیشن ضلع ادھومپور میں واقع ہیں۔ سیکورٹی اعتبار سے حساس علاقے میں دھماکہ حفاظتی اہلکاروں کے لیے ایک بڑا چیلنچ ہے۔ تاہم سیکورٹی ایجنسیز دھماکے سے متعلق تفتیش کر رہی ہیں۔
