ادھم پور میں 'ایک دیا شہداء کے نام' پروگرام کا انعقاد

ہر سال کی طرح اس بار بھی دیوالی کے موقع پر گول مارکیٹ ادھم پور میں 'ایک دیا شہداء کے نام' پروگرام کا انعقاد کیا گیا۔ پروگرام میں بڑی تعداد میں عہدیداروں اور معززین نے شرکت کی اور ملک کے لیے اپنی جانوں کا نذرانہ پیش کرنے والے شہیدوں کے نام پر دیا روشن کیا۔

جموں کشمیر کے ادھم پور گول مارکیٹ میں بدھ کی شام سماجی کارکن سریندر سنگھ خالصہ کی نگرانی میں 'ایک دیا شہداء کے نام' پروگرام کا انعقاد کیا گیا۔ اس پروگرام میں انتظامیہ اور پولیس کے کئی افسران کے علاوہ شہر کے معززین اور مختلف تنظیموں کے عہدیداران نے شرکت کی۔

پروگرام کا آغاز شہداء کے نام پر دیا روشن کر کے کیا گیا۔ اس موقع پر سریندر سنگھ خالصہ نے کہا کہ شروع میں جب یہ پروگرام منعقد کیا گیا تو لگتا تھا کہ ٹیم خالصہ اس کا اہتمام کر رہی ہے، لیکن آج خوشی ہے کہ لوگ خود اپنے گھروں سے چراغ اور تیل لے کر آ رہے ہیں۔

انہوں نے کہا کہ اس پروگرام کے انعقاد کا مقصد یہ بھی تھا کہ لوگ اس میں شامل ہوں اور شہداء کو یاد کریں، تاکہ شہداء کے اہل خانہ کو یہ محسوس نہ ہو کہ وہ تنہا ہیں۔

انہوں نے کہا کہ دیوالی کے دن اپنے گھروں کو روشن کرتے وقت اپنے گھروں، چوکوں اور عوامی مقامات پر شہداء کے نام پر دیے روشن کرنا ہر شہری اور اہل وطن کا فرض ہے۔