پٹاخے داغنے پر دولہے کے خلاف ایف آئی آر درج

اتر پردیش کے شہر نویڈا میں ضلعی انتظامیہ نے فضائی آلودگی کو کم کرنے کے لیے سخت اقدامات کرنے کا فیصلہ کیا ہے جس کے تحت ایک شادی میں پٹاخے داغنے پر دولہے اس کے والد اور متعلقہ افراد  کے خلاف ایف آئی آر درج کی گئی۔

ضلع میں فضائی آلودگی کو کم کرنے کے مقصد سے ضلعی مجسٹریٹ بی این سنگھ کی ہدایت پر ضلعی انتظامیہ این جی ٹی کے قوانین اور سپریم کورٹ کے احکامات کی تعمیل کو یقینی بنانے کے لئے کاروائی جاری رکھے ہوئے ہے۔

اس تناظر میں سٹی مجسٹریٹ نوئیڈا شیلندر کمار مشرا اور پولیس محکمہ اور آلودگی بورڈ کے ذریعے پٹاخے داغنے پر سخت کارروائی کرتے ہوئے بی 10 سوسائٹی سیکٹر 34 نوئیڈا کے دولہا اور اس کے والد کے خلاف ایف آئی آر درج کی گئی ہے۔

سٹی مجسٹریٹ نے کہا کہ ضلع میں جہاں بھی شادی کے موقع پر پٹاخے داغنے کی کوئی شکایت موصول ہوتی ہے تو متعلقہ افراد کے خلاف بھی ایسی ہی کارروائی کی جائے گی ، تاکہ ضلع میں آلودگی پر قابو پایاجاسکے۔

اب تک نوئیڈا میں دولہا اور منتظمین کے خلاف چار ایف آئی آر درج کی جا چکی ہیں۔ضلعی انتظامیہ کے افسران بھی اس سلسلے میں آگاہی پروگرام منعقد کررہے ہیں اور لوگوں سے فضائی آلودگی کو کم کرنے میں ضلعی انتظامیہ کی مدد کرنے کی اپیل بھی کر رہے ہیں۔