Padlock On Grave سوشل میڈیا پر وائرل مقفل قبر بھارتی شہر حیدرآباد کی ہے، نہ کی پاکستان کی

ہفتہ کے روز سوشل میڈیا پر ایک تالے بند قبر کی تصویر وائرل ہوئی اور یہ دعوی کیا گیا کہ مذکورہ قبر پاکستان میں ہے، جہاں مائیں اپنی بیٹیوں کی قبروں کو عصمت دری سے بچانے کے لئے قبروں میں تالے لگا رہی ہیں حالانکہ یہ معاملہ بالکل برعکس ہے، مذکورہ قبر بھارتی شہر حیدرآباد کی ہے نہ کی پاکستان کی۔Padlock on grave from Hyderabad

حیدرآباد: گزشتہ دو دنوں سے سوشل میڈیا پر ایک تالے بند قبر کی تصاویر وائرل رہی ہے اور دعوی کیا جارہا ہے کہ یہ قبر پاکستان کی ہے جبکہ حقیقت اس کے بالکل برعکس ہے۔ مذکورہ تالے والی قبر بھارتی شہر حیدرآباد کی ہیں نہ کہ پاکستان کی، جیسا کہ ایک مقامی شخص نے قبرستان میں جاکر مذکورہ قبر کی ویڈیو گرافی کرکے اس کا انکشاف کیا ہے۔ چند میڈیا ادارے بشمول نیوز ایجنسی این آئی اے نے ہفتے کے روز یہ خبر چلائی کہ پاکستان میں والدین اپنی بیٹیوں کی قبروں میں تالے لگارہے ہیں تاکہ انہیں عصمت دری سے بچایا جا سکے۔

تاہم اتوار کو سچائی اس وقت سامنے آئی جب گزشتہ دنوں حیدرآباد کے پرانے شہر کے مادنا پیٹ علاقے میں واقع قبرستان میں تالے لگی قبر کو دیکھنے والے ایک شخص نے سوشل میڈیا پر تصاویر اور ویڈیو پوسٹ کرنے کے لیے اسی جگہ کا دورہ کیا۔ ویڈیو میں موجود شخص نے انکشاف کیا کہ یہ اس کے دوست کی ماں کی قبر ہے۔ بوڑھی خاتون کا گزشتہ سال انتقال ہو گیا تھا اور اسے وہیں دفنانے کے بعد ان کے اہل خانہ نے تالہ لگا دیا تھا تاکہ کسی اور میت کی تدفین اسی جگہ پر نہ ہو سکے۔

مسجد سالار الملک کے مؤذن نے بتایا کہ انہوں نے دیکھا کہ کچھ لوگ اپنے مُردوں کو پرانی قبروں میں دفن کر رہے ہیں۔ ایسی حرکت کو روکنے کے لیے متوفی کے لواحقین نے لوہے کی گرل قبر پر لگا کر تالا لگا دیا۔ انہوں نے کہا کہ قبر کے اوپر گرل بھی لگائی گئی ہے کیونکہ یہ داخلی دروازے کے بالکل قریب ہے اور متوفی کے اہل خانہ اس بات کو یقینی بنانا چاہتے تھے کہ زائرین اس پر قدم نہ رکھیں۔

بتادیں کہ مسجد سالار الملک مذکورہ قبرستان کے قریب واقع ہے اور جس مؤذن نے اس حقیقت کا انکشاف کیا وہ اسی مسجد میں گذشتہ کئی برسوں سے اذان دینے کے فرائض انجام دے رہے ہیں۔