تلنگانہ ہائی کورٹ نے ریاست میں کورونا کی صورتحال کی آج سماعت کی اور ریاستی حکومت کو ہدایت دی ہے کہ وہ کورونا کی تیسری لہر پر ایکشن پلان داخل کرے۔ ساتھ ہی محکمہ صحت کو ہدایت دی گئی ہے کہ وہ آرٹی پی سی آرمثبت رپورٹ بھی داخل کرے۔
عدالت نے سوال کیا کہ ماہرین کی کمیٹی کا اجلاس کیوں نہیں منعقد کیاگیا؟عدالت نے ریمارک کیا کہ کورونا کی تیسری لہر کی روک تھام کیلئے منصوبہ اور طریقہ کار تک وائرس انتظار نہیں کرے گا۔اب تک بعض ریاستوں میں کورونا معاملات میں اضافہ ہوا ہے اوراس سے کئی افراد کی موت ہوئی ہے۔
عدالت نے تیسری لہر کو روکنے کیلئے اندرون ایک ہفتہ حکمت عملی تیار کرنے کی ہدایت دی اور اس کی ہدایت پر عمل نہ کرنے پر ڈائرکٹر محکمہ صحت،مرکز کے نوڈل آفیسرکو حاضر عدالت ہونے کی ہدایت دی۔ساتھ ہی عدالت نے زور دیتے ہوئے کہا کہ اس کی ہدایات پر کیوں عمل نہیں کیاجارہا ہے،اس کی تفصیلات فراہم کی جائیں۔