دل کا دورہ پڑنے سے شخص کی موت

ریاست تلنگانہ کے ضلع کریم نگر میں دل کا دورہ پڑنے سے ایک شخص کی موت ہوگئی تاہم کورونا وائرس کے شبہ میں لوگوں نے لاش کے قریب جانے سے گریز کیا۔

یہ واقعہ ضلع کریم نگر کے کشمیر گڈہ علاقہ کے رعتیو بازار کے قریب پیش آیا۔ یہ شخص سبزی کے لیے رعیتو بازار آیا تھا تاہم دل کا دورہ پڑنے سے وہ سڑک پر گرپڑا اور اس کی موت واقع ہوگئی۔

مقامی افراد نے شبہ ظاہر کیا کہ کورونا وائرس کی وجہ سے اس کی موت ہوئی ہے اور اگر وہ اس کے پاس جائیں گے تو وہ بھی اس مرض سے متاثر ہوجائیں گے۔

مقامی افراد نے اس بات کی اطلاع سرکاری عہدیداروں کو دی جس کے بعد عہدیدار وہاں پہنچے اور لاش کو وہاں سے منتقل کیا۔

کریم نگر ٹاون میں حال ہی میں انڈونیشیا سے آئے مبلغین میں کورونا وائرس پایا گیا جس کے بعد کریم نگر میں مکمل چوکسی اختیار کی جارہی ہے اور اس تعلق سے عوام میں کافی خوف پایا جاتا ہے۔