حیدرآباد کے مادناپیٹ علاقہ میں ہلکی کشیدگی

ریاست تلنگانہ میں شہر حیدرآباد کے مادناپیٹ علاقہ میں ہفتہ کی صبح ہلکی کشیدگی دیکھی گئی کیونکہ ایک بوتل جس میں مٹی کا تیل کے ساتھ ساتھ کپڑا ٹھونسا ہوا تھا، مندر کے احاطہ میں پایاگیا۔

اس واقعہ کی اطلاع کے ساتھ ہی پولیس اس علاقہ میں چوکس ہوگئی اور پولیس کی بھاری تعداد دیکھی گئی۔

یہ واقعہ علاقہ کی مادناپیٹ بویا بستی میں واقع ملاپوچماں مندر میں پیش آیا۔ ایک بوتل مندر کے شیڈ میں پائی گئی جبکہ دوسری بوتل مندر کے احاطہ میں پائی گئی۔

پجاری نے ان بوتلوں کو ہفتہ کی صبح دیکھا اور انتظامی کمیٹی کو چوکس کیا۔ اس کمیٹی نے پولیس کو اطلاع دی۔ پولیس کے سینئر عہدیدار مندر پہنچ گئے اور جانچ شروع کردی۔