کورونا سے ہلاک ہونے والوں کو کسی بھی قبرستان میں جگہ دی جائے: وقف بورڈ

تلنگانہ وقف بورڈ کے چیئرمین محمد سلیم نے کہا کہ کورونا وائرس سے ہلاک ہونے والوں کو کسی بھی قبرستان میں تدفین کے لیے جگہ دی جائے۔

تلنگانہ وقف بورڈ کے چیئرمین محمد سلیم نے میڈیا سے بات کرتے ہوئے کہا کہ قبرستان کمیٹیوں کو ہدایت دی گئی ہے کہ کورونا وائرس سے فوت ہونے والوں کو مفت میں قبر کی جگہ فراہم کریں۔

محمد سلیم نے کہا کہ جو کمیٹی قبر کی جگہ نہیں دے گی اس کمیٹی کے خلاف وقف بورڈ کی جانب سے کارروائی کی جائے گی۔

انہوں نے کہا کہ وقف بورڈ کی جانب سے کفن اور دفن کے لیے 5 ہزار روپے دیا جاتا ہے۔ عوام اس سے استفادہ کریں۔ کورونا وائرس کے سبب مریضوں کو آکسیجن کی کمی ہو رہی ہے۔ اس ضمن میں محمد سلیم نے کہا کہ بورڈ ممبرس میٹنگ کے بعد بورڈ کی جانب سے آکسیجن کا انتظام کیا جائے گا۔