تلنگانہ آرٹی سی کی ہڑتال، کل جماعتی اجلاس کل

ریاست تلنگانہ میں روڈ ٹرانسپورٹ کارپوریشن (آر ٹی سی ) کے 50 ہزار ملازمین اور کارکن ہڑتال پر ہیں، مظاہرین نے آر ٹی سی کو حکومت میں ضم کرنے کا مطالبہ کیا۔

تلنگانہ آرٹی سی ملازمین کی ہڑتال کے پیش نظر حکومت کی جانب سے کیے گئے اقدامات پر تبادلہ خیال کے لیے آرٹی سی جے اے سی کی جانب سے نو اکتوبر کو کل جماعتی اجلاس طلب کیا ہے۔

حیدرآباد کے سوماجی گوڑہ پریس کلب میں ہونے والے اس اجلاس میں ہڑتال کے سلسلہ میں مستقبل کے لائحہ عمل کو قطعیت دیئے جانے کا امکان ہے۔

تلنگانہ جناسمیتی پارٹی کے صدر پروفیسر کودنڈارام کی زیرصدارت ہونے والے اس اجلاس میں تمام سیاسی جماعتوں کے لیڈروں کو مدعو کیا گیا ہے۔جے اے سی کے لیڈروں نے یہ بات بتائی۔

بتایاجاتا ہے کہ حکومت اس ہڑتال کو ختم کراتے ہوئے ہڑتالی ملازمین کو رجوع کرنے کے سلسلے میں غور کررہی ہے جس کے پیش نظر بدھ کو ہونے والے اس اہم اجلاس کی اہمیت بڑھ گئی ہے۔

واضح رہے کہ ریاست تلنگانہ میں روڈ ٹرانسپورٹ کارپوریشن (آر ٹی سی ) کے 50 ہزار ملازمین اور کارکن ہڑتال پر ہیں، مظاہرین نے آر ٹی سی کو حکومت میں ضم کرنے کا مطالبہ کیا۔