تلنگانہ کو 12 پنچایت راج ایوارڈس ملنے پر ریاستی وزیر کی مبارکباد

تلنگانہ کے وزیر انفارمیشن ٹکنالوجی کے تارک راما راو نے ریاست کو 12 پنچایت راج ایوارڈس حاصل ہونے پر پنچایتوں کے عہدیداروں کو مبارکباد پیش کی ہے۔

تلنگانہ کی 12 پنچایتوں کو مختلف زمروں میں یہ ایوارڈس حاصل ہوئے ہیں۔ ریاستی وزیر راو جو سوشیل میڈیا کے اہم پلیٹ فارم ٹوئیٹر پر سرگرم رہتے ہیں، نے اس سلسلے میں کیے گئے ایک ٹوئٹ میں کہا کہ پلے پرگتی (گاؤں کی ترقی) پروگرام وزیراعلی کے چندر شیکھر راو کے ذہن کی اختراع ہے اور وزیر پنچایت راج دیاکر راؤ اور ان کی ٹیم نے اس پروگرام کو انجام دیا ہے۔

مرکزی وزارت پنچایت راج نے ان ایوارڈس کا اعلان کیا ہے۔ ریاست کی 9 گرام پنچایتوں، 2 منڈل پریشدوں اور ایک ضلع پریشد کو دین دیال اُپادھیائے پنچایت ششکتی کرن پرسکار 2021کے تحت مختلف زمروں میں یہ ایوارڈس حاصل ہوئے ہیں۔

یواین آئی