تلنگانہ: وزیر خزانہ ہریش راؤ کی مرکز پر نکتہ چینی

ہریش راؤ نے کہا ہے کہ عوام کو یہ سوچنا چاہئے کہ کون ان پر بوجھ ڈال رہا ہے اور کون ان کے پیٹ کا خیال رکھ رہا ہے۔ کام کرنے والی حکومت کو عوام کا آشیرواد چاہئے۔

تلنگانہ کے وزیر خزانہ نے کریم نگر ضلع کے ایلندوکنٹہ میں خواتین کی خودروزگار تنظیموں کے اجلاس میں سیلف ہیلپ گروپس کی خواتین کو سود سے پاک قرض کو بینک سے جوڑنے، استری ندھی قرض کی تقسیم کے پروگرام کاآغاز کیا۔

اس موقع پر منعقدہ تقریب سے خطاب کرتے ہوئے انہوں نے پٹرول،گیس،ڈیزل اور کیروسین کی قیمتوں میں اضافہ پر مرکزکی بی جے پی زیرقیادت حکومت پر شدید نکتہ چینی کی۔

انہوں نے واضح کیا کہ عوام کےلیے ریاستی حکومت کی جانب سے آسراوظیفہ،رعیتوبندھو،کلیانا لکشمی اور شادی مبارک جیسی اسکیمات کا آغاز کیاگیا ہے۔

حکومت غریب لڑکی کی شادی پر ایک لاکھ 116روپئے کی رقم فراہم کررہی ہے۔ریاست کے سرکاری اسپتالوں کی بہتر حالت وزیراعلی کے چندرشیکھرراو نے کروائی ہے۔ اورسرکاری اسپتالوں میں زچگی پر کے سی آرکٹس فراہم کی جارہی ہیں۔سرکاری اسپتالوں کو زچگی کے لئے لایاجارہا ہے اور پھر زچگی کے بعد زچہ،بچہ اور ان کے رشتہ داروں کو حکومت کی جانب سے ایمبولنس میں گھر چھوڑنے کا کام مفت میں کیاجارہا ہے۔

انہوں نے کہا کہ آنگن واڑی مراکز میں بچوں کو تغذیہ بخش غذافراہم کی جارہی ہے۔بچوں کو معیاری تعلیم کی فراہمی کیلئے گروکل اسکولس کھولے گئے ہیں۔ریاستی حکومت 2016روپئے وظیفہ کی رقم ضعیف افراد، بیواوں کو فراہم کررہی ہے جس سے ان کی عزت نفس میں اضافہ ہوا ہے۔مفت بجلی اور پانی زرعی مقصد کیلئے فراہم کیاجارہا ہے۔

یواین آئی