حیدرآباد: جونیئر ڈاکٹرز کا احتجاج جاری

حیدرآباد میں گاندھی ہسپتال کے جونیئر ڈاکٹرز کا احتجاج دوسرے دن بھی جاری ہے۔ جونیئر ڈاکٹرز حکومت سے سیکوریٹی کا مطالبہ کر رہے ہیں۔

گاندھی ہسپتال کے جونیئر ڈاکٹرز نے آج دوسرے دن بھی سڑکوں پر اپنے احتجاج کو جاری رکھا جبکہ گذشتہ روز کورونا وائرس سے متاثر مریض کے رشتہ داروں نے مبینہ طور پر ڈاکٹرز پر حملہ کیا تھا۔

اطلاعات کے مطابق گاندھی ہسپتال میں گذشتہ روز کورونا مریض کے رشتہ داروں کی جانب سے جونیئر ڈاکٹر پر مبینہ حملہ کیا گیا۔ جونیئر ڈاکٹرز نے تحفظ کا مطالبہ کرتے ہوئے رات دیر گئے گاندھی ہسپتال میں دھرنا منظم کیا تھا اور حکومت سے تحفظ کے لیے اسپیشل پروٹیکشن فورس کو تعینات کرنے کا مطالبہ کیا ہے۔

گذشتہ روز 55 سالہ کورونا مریض کی مشتبہ موت کے بعد رشتہ داروں نے ڈاکٹرز پر لاپرواہی کا الزام لگاتےہوئے حملہ کردیا جبکہ ڈاکٹرز کا کہنا ہے کہ مریض ضرورت سے فارغ ہونے کے دوران گرکر فوت ہوگیا۔