گورنرتلنگانہ سے کانگریس وفد کی ملاقات، ریونت ریڈی کے سی ایل پی لیڈرکے انتخاب سے واقف کروایا

تلنگانہ کانگریس کے ایک وفد نے گورنر تمیلی سائی سوندرا راجن سے راج بھون میں ملاقات کرتے ہوئے پارٹی کے اسمبلی کے لئے نومنتخب 64 ارکان کی فہرست حوالے کی۔

حیدرآباد: تلنگانہ کانگریس کے ایک وفد نے گورنر تمیلی سائی سوندرا راجن سے راج بھون میں ملاقات کرتے ہوئے پارٹی کے اسمبلی کے لئے نومنتخب 64 ارکان کی فہرست حوالے کی۔ انہوں نے کہاکہ ان تمام ارکان نے ریونت ریڈی کو سی ایل پی لیڈرمنتخب کیا ہے۔ ان کی دستخطوں کے ساتھ ایک مکتوب گورنر کے حوالے کیاگیا۔ اس وفد جس میں تلنگانہ پردیش کانگریس کے کارگذار صدر مہیش کمارگوڑ، سینئر نائب صدر ملو روی اور دوسرے موجود تھے نے گورنر سے خواہش کی کہ جمعرات کی دوپہر شہر کے ایل بی اسٹیڈیم میں ہونے والی تقریب حلف برداری کے انتظامات کو یقینی بنائیں۔

اسی دوران پولیس نے تلنگانہ کے نامزد وزیر اعلیٰ ریونت ریڈی کی حیدرآباد میں واقع رہائش گاہ پر سخت سیکوریٹی انتظامات کیے ہیں۔ رہائش گاہ سے 200 میٹر کے فاصلے پر رکاوٹیں کھڑی کر دی گئی ہیں اور مختلف پابندیاں عائد کر دی گئی ہیں۔ انٹلی جنس پولیس پہلے ہی ریونت کی رہائش گاہ کے آس پاس کے علاقوں کا معائنہ کر چکی ہے۔ ریونت ریڈی کل صبح اپنے جوبلی ہلز گھر سے ایل بی اسٹیڈیم میں حلف برداری کی تقریب میں شرکت کیلئے جائیں گے۔ اسی دوران بلدیہ کے عہدیداروں نے ان کے گھر کو جانے والے راستوں کی صفائی اور ان کو بہتر بنانے کا کام کیا ہے۔

یو این آئی