تلنگانہ: خواتین پولیس کے لیے علاحدہ ٹریننگ سینٹر کا افتتاح

حیدرآباد میں آج سٹی کمشنر پولیس انجنی کمار نے خواتین پولیس عہدیداروں کے لیے علاحدہ ٹریننگ سینٹر کا افتتاح کیا۔

ریاست تلنگانہ کے دارالحکومت حیدرآباد کے تلنگانہ پولیس ہیڈ کوارٹر پیٹلہ برج میں آج خواتین پولیس عہدیداروں کے لیے ایک علاحدہ ٹریننگ سینٹر کا افتتاح کیا گیا۔

تشکیل تلنگانہ کے بعد وزیر اعلیٰ کے چندر شیکھر راؤ نے پولیس فورس میں خواتین کی نمائندگی کو بہتر بنانے اور خواتین کے خلاف جرائم پر قابو پانے کی کوشش میں خواتین کے لیے 30 فیصد ریزرویشن دیا ہے۔ حیدرآباد میں محکمۂ پولیس میں 600 سے زائد خواتین کو ملازمت ملی ہے اور ان خواتین کے لیے علاحدہ ٹریننگ سینٹر کا قیام بھی عمل میں لایا گیا ہے، جس کا افتتاح آج سٹی کمشنر پولیس انجنی کمار نے کیا۔

اس موقع پر انجنی کمار نے خواتین پولیس اہلکاروں کو مبارک باد دی۔ انہوں نے کہا کہ خواتین پولیس اہلکار مردوں کے شانہ بشانہ ہوکر کام کررہی ہیں۔ جب بھی شہر میں نظم و نسق کو برقرار رکھنے کی بات ہوتی ہے تو یہ خواتین پولیس اہلکار بخوبی اپنے فرائض انجام دیتی ہیں۔ اس لیے ان کے لیے علاحدہ ٹریننگ سینٹر کا قیام عمل میں لایا گیا ہے۔