Telangana Assembly Polls 2023 تلنگانہ اسمبلی انتخابات کے پیش نظر بی آر ایس کے 115 امیدواروں کا اعلان

تلنگانہ اسمبلی انتخابات کے پیش نظر حکمراں جماعت بی آر ایس نے ریاست کی کل 119 اسمبلی نشستوں میں سے 115 نشستوں کے امیدواروں کے ناموں کا اعلان کر دیا ہے۔ بی آر ایس سربراہ نے موجودہ ایم ایل ایز کی اکثریت کو برقرار رکھا ہے اور وزیراعلی چندر شیکھر راو دو حلقوں سے انتخاب لڑنے کا فیصلہ کیا ہے۔

حیدرآباد: تلنگانہ کی حکمراں جماعت بی آر ایس نے رواں برس کے اواخر میں ہونے والے اسمبلی انتخابات کے سلسلہ میں ریاست کی کل 119 اسمبلی نشستوں میں سے 115 نشستوں کے امیدواروں کے ناموں کا اعلان کر دیا ہے۔ پارٹی کے قومی صدر و وزیراعلی چندر شیکھر راو نے پارٹی کے ہیڈکواٹرس تلنگانہ بھون میں امیدواروں کی فہرست جاری کی۔ وزیراعلی دو حلقوں کاماریڈی اور گجویل سے مقابلہ کریں گے۔

انہوں نے میڈیا کانفرنس کے دوران امیدواروں کے ناموں کا اعلان کرتے ہوئے کہا کہ مختلف وجوہات کی بناء پر صرف 7 موجودہ ارکان اسمبلی کو ٹکٹ سے محروم کیا گیا ہے۔ انہوں نے بوتھ 'خانہ پور، وائرا، کورٹلہ، اپل، آصف آباد اور ویملواڑہ حلقوں کے امیدواروں کی تبدیلی کا بھی اعلان کیا۔ انہوں نے کہا کہ بقیہ چار حلقوں نرساپور، نامپل، ‘گوشہ محل اور جنگاوں کے امیدواروں کے ناموں کا جلد اعلان کیا جائے گا۔

انہوں نے اس یقین کا اظہار کیا کہ ان کی پارٹی 95 تا 105 نشستوں پر کامیابی حاصل کرے گی۔ انہوں نے کہا کہ ورنگل میں پارٹی کے منشور کا اعلان کیا جائے گا جہاں 16 اکتوبر کو بی آر ایس بڑے پیمانہ پر جلسہ منعقد کرے گی۔ 2018 کے اسمبلی انتخابا ت کے دوران چندر شیکھر راو نے 105 امیدواروں کا اعلان کیا تھا۔ ان میں تمام موجودہ ارکان اسمبلی ہیں۔

قابل ذکر ہے کہ تلنگانہ کے وزیر اعلی کے چندر شیکھر راؤ کافی وقت سے بی جے پی پر براہ راست تنقید نہ کرکے اب کانگریس پر سیدھا حملہ بول رہے ہیں۔ اتوار کے روز انہوں نے اپوزیشن کانگریس کو نشانہ بناتے ہوئے کہا کہ اگر یہ پارٹی ریاست میں اقتدار میں آتی ہے تو پھر سرکاری دفاتر میں دلالی (بیچولیہ) کا دور شروع ہو جائے گا۔

سوریا پیٹ میں ایک عوامی ریلی سے خطاب کرتے ہوئے کے سی آر نے ریاست میں اقتدار میں آنے پر 4000 روپے سماجی پنشن کے طور پر ادا کرنے کے وعدے پر کانگریس کو مزید نشانہ بنایا اور پوچھا کہ ریاستوں میں اس طرح کی اسکیم کیوں نافذ نہیں کی جا رہی ہے۔50 سال حکومت کرنے والی کانگریس صرف 200 روپے سماجی پنشن دیتی تھی اور اب وہ کہتے ہیں کہ ہمیں ایک موقع دو، ہم اسے 4000 روپے کر دیں گے۔ (یو این آئی مشمولات کے ساتھ)