حیدرآباد:تلنگانہ کی حکمران جماعت ٹی آر ایس کی قانون ساز کونسل کی کے کویتا نے بلقیس بانو جنسی زیادتی معاملہ کے مجرمین کی معافی پر سوال اٹھاتے ہوئے کہا کہ جنسی زیادتی اور قتل جیسے گھناؤنے جرائم کے خاطیوں کو یوم آزادی کے موقع پر رہا کرنا اس مبارک دن کو داغدار کرنے کے مترادف ہے۔Bilkis Bano Rapre Case Convicts Released
کے کویتا نے مجرموں کی رہائی ردعمل ظاہر کرتے ہوئے کہا کہ گجرات کی بی جے پی حکومت نے بلقیس بانو کے ساتھ اجتماعی جنسی زیادتی کرنے والوں اور ان کی تین سالہ بیٹی کے قاتلوں کو معاف کر کے وحشیانہ سوچ کو فروغ دیا ہے۔ یہ قانون و انصاف کی روح اور انسانیت کے خلاف ہے۔
مزید پڑھیں:Rahul Gandhi on Bilkis Bano Case بلقیس بانو معاملہ میں راہل گاندھی نے وزیراعظم کو تنقید کا نشانہ بنایا
کے کویتا نے کہا کہ ایک خاتون ہونے کے ناطے وہ بلقیس بانو کے درد اور خوف کو محسوس کر سکتی ہیں۔ جس طرح جنسی زیادتی کرنے والوں اور قاتلوں کو جیل سے رہا ہونے پر عزت دی گئی وہ مہذب معاشرہ کے منہ پر زناٹے دار طمانچہ ہے۔ اس خطرناک عمل کو شروع میں ہی روکنا ضروری ہے۔ انہوں نے کہا کہ قانون پر سب کا اعتماد برقرار رکھنے کے لیے ضروری ہے کہ قاتلوں کی معافی کا یہ شرمناک فیصلہ واپس لیا جائے۔ انہوں نے سپریم کورٹ سے درخواست کی ہے کہ وہ اس معاملے میں مداخلت کرتے ہوئے از خود نوٹس لے۔
یو این آئی
