مسلح افواج میں بھرتی کے لئے مرکزی حکومت کی جانب سے متعارف اسکیم اگنی پتھ کو واپس لینے کامطالبہ کرتے ہوئے گذشتہ جمعہ کو سکندرآباد ریلوے اسٹیشن پر کئے گئے پُرتشدد احتجاج میں شامل ایک نوجوان نے خودکشی کی کوشش کی۔اس کو علاج کے لئے ورنگل کے ایم جی ایم اسپتال منتقل کردیاگیا۔ Youth Suicide Attempt
تفصیلات کے مطابق جنگاوں ضلع کے اسٹیشن گھن پور سے تعلق رکھنے والے گووند اجئے نامی نوجوان نے اس اسکیم کے خلاف کئے گئے احتجاج میں دیگر نوجوانوں کے ساتھ حصہ لیا تھا۔اس نے احتجاج کے دوران ایک ٹی وی چینل سے کی گئی بات چیت میں مرکزی حکومت کی اس اسکیم کی شدید مخالفت کی تھی۔سکندرآباد ریلوے اسٹیشن میں پُرتشدد احتجاج میں شامل نوجوانوں کو پولیس کی جانب سے گرفتار کئے جانے کی اطلاع پر خود کی گرفتاری کے خوف سے اس نے چارصفحات پر مشتمل سوسائیڈ نوٹ لکھ کر اپنے گاوں کے واٹس اپ گروپ میں پوسٹ کردیااور خودکشی کی کوشش کی۔اس کو علاج کے لئے ایم جی ایم اسپتال منتقل کیا گیا۔