من گھڑت خبروں کو پھیلانے سے پرہیز کیا جائے: بی جے پی

بی جے پی کا یہ احساس ہے کہ وزیراعلی کے دفتر کی جانب سے پیدا کردہ الجھن خطرناک ہے، جس کے نتیجہ میں لوگ دیہی علاقوں کو واپس ہو رہے ہیں۔

تلنگانہ بی جے پی نے مطالبہ کیا کہ وزیراعلی کے چندرشیکھرراؤ اپنے دفتر کے عہدیداروں کو ہدایت دیں کہ من گھڑت خبروں کو پھیلانے سے گریز کریں، جس کے سبب ریاست کے عوام میں الجھن پائی جاتی ہے۔

من گھڑت خبروں کو پھیلانے سے پرہیز کیا جائے: بی جے پی

اپنے بیان میں بی جے پی کے ریاستی ترجمان کرشنا ساگر راؤ نے کہا کہ بی جے پی روزانہ اجرت پر کام کرنے والوں، آٹو ڈرائیورس اور تلنگانہ کے اضلاع اور پڑوسی ریاستوں سے تعلق رکھنے والے دیگر نقل مکانی کرنے والے مزدوروں کے بارے میں فکر رکھتی ہے جو گذشتہ دو دنوں سے اپنے مکانات کو واپس لوٹ رہے ہیں۔

انہوں نے کہا کہ جاریہ ہفتہ کے اوائل میں حیدرآباد میں امکانی لاک ڈاؤن سے متعلق وزیراعلی کے دفتر کی جانب سے میڈیا میں من گھڑت خبروں کے پھیلانے سے جی ایچ ایم سی علاقہ کے لاکھوں افراد کو مشکل صورتحال کا سامنا کرنا پڑ رہا ہے۔

انہوں نے کہا کہ بی جے پی کا یہ احساس ہے کہ وزیراعلی کے دفتر کی جانب سے پیدا کردہ الجھن خطرناک ہے جس کے نتیجہ میں لوگ دیہی علاقوں کو واپس ہو رہے ہیں۔

انہوں نے کہا کہ اس سے تلنگانہ کے دیہی علاقوں میں کووڈ-19 کے معاملات منتقل ہوسکتے ہیں جو اب تک انفکشن سے پاک ہے۔ انہوں نے مزید کہا کہ اس پریشانی نے نقل مکانی میں اضافہ کیا ہے اور اس کے نتیجہ میں بڑے پیمانہ پر لوگ بے روزگار ہوگئے ہیں۔ یومیہ اجرت پر کام کرنے والوں اور نقل مکانی کرنے والے مزدوروں کی آمدنی متاثر ہوئی ہے۔