حیدرآباد میں سڑک حادثہ، چھ ہلاک

ریاست تلنگانہ کے دارالحکومت حیدرآباد میں آج ایک سڑک حادثہ میں چھ افراد ہلاک ہوگئے۔

حیدرآباد میں شمس آباد کے قریب پیش آئے سڑک حادثہ میں مرنے والوں کا تعلق کرناٹک کے رائچور سے تھا جبکہ حادثہ میں مزید چھ افراد زخمی بھی ہوئے ہیں۔

لاک ڈاون کے چلتے سوریہ پیٹ میں تقریباً تیس مزدور روزگار سے محروم ہونے کے بعد اپنے آبائی مقام کو جارہے تھے کہ یہ حادثہ پیش آیا۔ مرنے والوں میں ڈرائیور کے علاوہ ایک خاتون، ایک شیرخوار اور ایک کمسن لڑکی بھی شامل ہے۔

بولیرو گاڑی میں تقریباً تیس مزدور آوٹر رنگ روڈ سے رائچور جارہے تھے کہ ایک لاری نے پیچھے سے ٹکر دیدی۔ آم سےبھری لاری کا ڈرائیور حادثہ کے بعد فرار ہوگیا۔

پولیس نے تمام زخمیوں کو عثمانیہ ہسپتال منتقل کیا ہے جہاں ان کا علاج کیا جارہا ہے۔ پولیس نے ایک کیس درج کرکے تفتیش کا آغاز کردیا ہے۔