تلنگانہ کے برطرف وزیر ای راجندراسمبلی کی رکنیت سے مستعفی

اراضیات پر غیرمجاز قبضوں کے الزامات پر تلنگانہ کابینہ سے برطرف وزیر، ای راجندر نے اسمبلی کی اپنی رکنیت سے استعفی پیش کردیا ہے۔

تلنگانہ کابینہ سے برطرف وزیر ایٹالہ راجندر جنہوں نے حال ہی میں قومی دارالحکومت میں بی جے پی کی اعلی قیادت سے ملاقات کی تھی، اب انہوں نے بی جے پی میں شمولیت کا اعلان کیا ہے۔

اسمبلی میں حضورآباد حلقہ کی نمائندگی کرنے والے ای راجندر نے آج حیدرآباد میں ریاستی اسمبلی کے سامنے واقع گن پارک یادگار شہیداں پر خراج پیش کیا جس کے فوری بعد وہ اسمبلی میں اسپیکر کے دفتر پہنچے اور اپنا مکتوب استعفی اسپیکر فارمیٹ میں سکریٹری اسمبلی کو پیش کردیا۔

بتایاجاتا ہے کہ 'وہ آج شام دہلی روانہ ہونے والے ہیں جہاں وہ 14جون کو بی جے پی کے قومی صدر جے پی نڈا سے ملاقات کرتے ہوئے رسمی طور پر بی جے پی میں شامل ہوجائیں گے۔

ای راجندر سمیت اے رویندر ریڈی، ٹی اوما اور دیگر بھی بی جے پی میں شامل ہونے والے ہیں۔آرٹی سی ملازمین کی یونین کے لیڈر اشواتھاما ریڈی کے بھی جلد ہی بی جے پی میں شامل ہو سکتے ہیں۔

اس موقع پر میڈیا سے بات کرتے ہوئے ای راجندر نے کہا کہ 'ان پر اسمبلی کی رکنیت سے استعفی نہ دینے دباو تھا تاہم انہوں نے اپنے عہدہ سے استعفی دے دیا۔'

(یو این آئی)