حیدرآباد: بی جے پی حامی کے قبضہ سے ایک کروڑ روپئے ضبط

حیدرآباد پولیس نے آج ایک کروڑ روپئے کی رقم ضبط کرنے کا دعویٰ کیا ہے۔ حیدرآباد کے پولیس کمشنر انجنی کمار نے میڈیا سے بات کرتے ہوئے بتایا کہ اس رقم کو دوباک لے جایا جارہا تھا تاکہ وہاں ووٹرس میں تقسیم کیا جاسکے۔

حیدرآباد پولیس کمشنر انجنی کمار نے آج ایک پریس کانفرنس سے خطاب کرتے ہوئے بتایا کہ حیدرآباد کے بیگم پیٹ علاقے میں ایک کار سے ایک کروڑ روپئے ضبط کئے گئے جبکہ اس رقم کو دوباک لے جانے کی کوشش کی جارہی تھی۔ اس کاروائی میں دو لوگوں کو گرفتار کرلیا گیا۔

انہوں نے کہا کہ ابتدائی تحقیقات سے پتہ چلا ہے کہ ضبط شدہ رقم کو دوباک لے جاکر بی جے پی کی جانب سے ووٹرز میں تقسیم کیا جانا تھا۔ گرفتار کئے گئے شخص کی شناخت سرینواس راؤ کو دوباک حلقہ سے بی جے پی امیدوار رگھونندن راؤ کے برادر نسبتی ہے کہ طور پر کی گئی۔ کاروائی میں ڈرائیور ٹی روی کمار کو بھی گرفتار کیا گیا۔

انجنی کمار نے بتایا کہ سرینواس راؤ نے بیگم پیٹ میں وشاکھا انڈسٹریز کے دفتر سے یہ رقم حاصل کی اور اس رقم کو بی جے پی امیدوار کی جانب سے دوباک کے ووٹرس میں تقسیم کرنے کا منصوبہ تھا۔ وشاکھا انڈسٹریز پداپلی کے سابق رکن پارلیمنٹ کی ملکیت ہے جبکہ انہوں نے رقم کو دوباک منتقلی کےلیے سرینواس کو دی تھی۔

دوباک ضمنی انتخابات کےلیے انتخابی مہم کا آج شام اختتام عمل میں آیا اور رائے دہی منگل کو ہوگی۔