Raksha Bandhan: تلنگانہ کے بس اسٹینڈز پر خواتین و لڑکیوں کا ہجوم

بہنوں اور بھائیوں کے رشتہ کے اٹوٹ بندھن راکھی کے سلسلہ میں کئی بہنیں اپنے آبائی مواضعات کو روانہ ہوئیں جس کے لئے عوامی ٹرانسپورٹ کا سہارا لیا گیا۔

گزشتہ سال کورونا وبا کی وجہ سے کئی لڑکیاں اور خواتین اپنے بھائیوں کو راکھی باندھنے کے لئے اپنے آبائی مقامات سے شہر حیدرآباد اور شہر حیدرآباد سے اپنے آبائی مقامات کو نہیں جاپائی تھیں تاہم اس مرتبہ کورونا کی لہر کے خاتمہ کے سبب یہ لڑکیاں اور خواتین اپنے آبائی مقامات سے شہر اور شہر سے آبائی مقامات کے لئے راکھی تہوار منانے روانہ ہوئیں جس کے نتیجہ میں بس اسٹینڈز پر ہجوم دیکھا گیا۔

آرٹی سی کی کارگوپارسل اور کورئیر خدمات سے بھی استفادہ کیا گیا۔ راکھی اسپیشل کاونٹر بنائے گئے تھے جہاں پر 250 گرام وزنی راکھی کو تلنگانہ کے اندر بھیجنے کے لئے 30 روپئے، تلنگانہ کے باہر بھیجنے 75 روپئے وصول کئے گئے۔ اسی طرح 500 گرام وزنی راکھی کو تلنگانہ کے اندر بھیجنے کے لئے 40 روپئے اور تلنگانہ کے باہر بھیجنے 100 روپئے چارج کئے گئے۔ 501 تا 1000 گرام راکھی کو تلنگانہ کے اندر بھیجنے 60 روپئے اور تلنگانہ کے باہر بھیجنے کے لئے 125 روپئے وصول کئے گئے۔ کئی خواتین اور لڑکیوں نے شکایت کرتے ہوئے کہا کہ راکھی تہوار کی وجہ سے بسوں میں مسافرین کا کورونا گائڈ لائنز کے برخلاف زیادہ ہجوم ہے۔

یو این آئی