یوم اساتذہ کے موقع پرحیدرآباد میں اساتذہ کا احتجاج

پرائیویٹ اسکولز کے مالکن اورحکومت کے رویہ کے خلاف حیدرآباد میں ڈی ای او کے دفتر کے سامنے تلنگانہ پرائیویٹ ٹیچرس فورم کی جانب سے احتجاج کیاگیا۔

آج یوم اساتذہ کے موقع پر اساتذہ کی تنظیموں نے یوم سیاہ منایا۔

ریاست بھرمیں احتجاج کے حصہ کے طورپر حیدرآبادکے ڈی ای او دفتر کے سامنے سیاہ بیچس،سیاہ جھنڈے لگاتے ہوئے احتجاج کیاگیا۔انہوں نے اساتذہ کے لئے شناختی کارڈس فراہم کرنے کا مطالبہ کیا۔

جی او45 کے مطابق پرائیویٹ ٹیچرس، نان ٹیچنگ اہلکاروں کو مکمل تنخواہ کی ادائیگی کا بھی مطالبہ کیا گیا۔

انہوں نے مطالبہ کیا کہ حکومت پرائیویٹ ٹیچرس کے خاندانوں کی مالی طورپر مدد کرے۔ساتھ ہی پرائیویٹ تعلیمی اداروں کو باقاعدہ بنانے کے لئے ریگولیٹری کمیٹی قائم کی جائے۔اساتذہ کو ای ایس آئی، پی ایف، حادثہ کی صورت میں انشورنس کی سہولت فراہم کی جائے۔ان اساتذہ نے کہا کہ لاک ڈاون کے بعد سے ہی اسکولس بند ہیں جس کے نتیجہ میں ان کو تنخواہوں سے محروم ہونا پڑرہا ہے۔