دہلی: وزیراعظم نریندر مودی نے ریاست تلنگانہ کے نئے وزیراعلی ریونت ریڈی کو تلنگانہ کے چیف منسٹر کی حیثیت سے حلف لینے پر مبارکباد پیش کی۔ وزیراعظم مودی نے ایکس پر ایک پوسٹ میں کہا کہ میں ریاست کی ترقی اور اس کے شہریوں کی فلاح و بہبود کے لیے ہر ممکن تعاون کا یقین دلاتا ہوں۔
- ریونت ریڈی کو اسٹالن کی مبارکباد
تمل ناڈو کے وزیراعلی اسٹالن نے تلنگانہ کے اپنے ہم منصب ریونت ریڈی کومبارکباد پیش کی ہے۔انہوں نے سوشیل میڈیا کے اہم پلیٹ فارم ایکس پر اس سلسلہ میں کئے گئے ٹوئیٹ میں کہاکہ ان کی ریونت ریڈی سے فون پر ہوئی بات چیت کے دوران انہوں نے گرمجوشانہ مبارکباد پیش کرتے ہوئے نیک تمناوں کا اظہار کیا۔انہوں نے پُراثر اور کامیاب معیاد کے لئے ریونت ریڈی سے نیک تمناوں کا اظہار بھی کیا۔
واضح رہے کہ ملک کی 29ویں ریاست تلنگانہ کے دوسرے وزیراعلی کے طور پر آج دوپہر ٹھیک ایک بجکر 4 منٹ پر ریونت ریڈی نے شہر حیدرآباد کے ایل بی اسٹیڈیم میں منعقدہ عظیم الشان تقریب میں حلف لیا۔ان کے ساتھ وزراء ملو بھٹی وکرامارکا، اتم کمار ریڈی،کومٹ ریڈی وینکٹ ریڈی، سیتکا، کونڈا سریکھا، سریدھر بابو، پی سرینواس ریڈی، ٹی ناگیشور راو، دامودر راج نرسمہا، سدرشن ریڈی، پونم پربھاکر نے بھی حلف لیا۔
مزید پڑھیں:وزیراعلی تلنگانہ ریونت ریڈی نے وزراء کے ساتھ حلف لے لیا
اس حلف برداری تقریب میں کانگریس کے سرکردہ رہنما بشمول پارٹی کے صدر ملکارجن کھرگے سونیا گاندھی، راہل گاندھی، پرینکا گاندھی، وزیراعلی کرناٹک سدارامیا، ان کے نائب ڈی کے شیواکمار، کرناٹک کے کئی وزراء اور پارٹی لیڈران کے علاوہ دوسری ریاستوں کے پارٹی لیڈران نے بھی شرکت کی۔
